1 Corintios 2

1 Bee saêa enu nzeli arquiaêahua Jesucristo liêihua nediyaêhua nú chenu uyaêa lachihua, unia Stichiaê Diose luhua, lá nia luhua bee bedichiaê nú neyaañi o bee bedichiaê nú neriñaê riêihua beyaê, 2 mientra nú nzua cuna liêihua, lá nia stucu nú rene luhua, unitsia luhua tucutsia equie cuendaê Jesucristo para nú riêihua beyaê xiquie nú ungutinu lu cruse. 3 Chenu uriña lachihua necaa tucu nú neca tucu bene enu la luêcu juerzaê nu hasta recatseêtseêa nú xiquia chenu uriña luhua. 4 Leêca chenu unia luhua Stichiaê Diose, lá nia luhua bee bedichiaê nú riêá ana liêihua cuna stichiaêa, sino que uriêá ana nú uchili arquiêhua Jesucristo equie cuendaê Espíritu Santo nu cuna poderê Diose. 5 Para nú aca achee nú lunú nzeli arquiaêahua Jesucristo necane equie nú reca Diose rriêi nu lacane lunú recatsia elliebacuê bee bene iliulabe. 6 Añinzuca nú chenu seteêahua bee bene enu másela reca Stichiaê Diose, seteêahua beella equie cuendaê elliebacuê nú reca nú nzeêta lu Diose, nu la necane elliebacuê nú reca bee bene iliulabe quieê nu leêca lacane xi neca elliebacuê nú rluêcu bee enu rnibiyaê lu iliulabe quieê, elliebacuê nú nzeêta bichia nú nitilu. 7 Sino que rniaêahua elliebacuê nú reca nzeêta lu Diose, elliebacuê nú unga xi neca tucu nú aêchiê neca para lubee bene iliulabe nú xneca riña bee bene lu Diose. Nu elliebacuê cuaê unila Diose desde ante nú quixie iliulabe. 8 Bee nucuaê neca nú lá riêi bee bene enu rnibiyaê lu iliulabe quieê beyaê, xne tunu uriêi beella beyaê nucuaê, lá quieêe beella Jesucristo lu cruse, liêinu enu rnibiyaê. 9 Pero lu ichiê Stichiaê Diose rni: Niê tucu bene lecati ulañiê, nu ubeneê, nu niê lá riêi elliebacuê lunú nuêcheê Diose para bee bene enu seca liêinu. 10 Pero ulubeêla Diose nucuaê luaêahua equie cuendaê Espíritu Santo nú nzu cuna liaêahua, xne Espíritu Santo nediyaê yeene, hasta beenú máse neriñaê riêi bene beyaê nzeêta lu Diose. 11 Liêihua nediyaêhua nú lecati riêi beyaê nú xi elliebacuê rriêi tucu bene, espírituêtsialla nediyaê xi elliebacuê rriêilla. Scua necane xne tucutsia Espírituê Diose nediyaê xi rriêinu elliebacuê. 12 Nu liaêahua enu nzenalala inziuê Diose, la nehuañiaêahua cuna espíritu nú nuê lu iliulabe quieê sino que nehuañilaêahua cuna Espíritu Santo nú uliquiê Diose, para nú equie cuendaê Espíritu Santo riaêahua beyaê luye nú uliquiê Diose luaêahua lunú chiquiê nzeêcanu. 13 Nu bee nucuaê neca nú seteêahua bee bene, pero lacane lunú necatsia elliebacuêahua, sino que Espíritu Santo neca enu rlubeê luaêahua nú xneca seteêahua bee bene. Nu scua seteêahua lunú neca cuendaê Diose lubee bene enu nehuañi cuna Espíritu Santo. 14 Pero bee bene enu la nehuañi cuna Espíritu Santo la chili arquiê lunú neca cuendaê Diose, xne para liêibeei necane nú la zibiê. Enzeêe la riêibeei beyaê lunú neca cuendaê Diose, xne hasta cuna elietsaê Espíritu Santo rriêi bee bene beyaê lunú neca cuendaê Diose. 15 Pero bee bene enu nehuañila cuna Espíritu Santo equie cuendaê Espíritu Santo rriêilla beyaê luye lunú neca cuendaê Diose, nu niêtucu bee bene enu la nehuañi cuna Espíritu Santo la riêi beyaê xiquie nú rriêi benecuaê beyaê lunú neca cuendaê Diose. 16 Lu ichiê Stichiaê Diose rni: “Lecati nuêlu elliebacuê Diose para nú nilla lu Diose nú xi riêinu.” Pero liaêahua equie cuendaê Espíritu Santo neca tucu necatsela elliebacuaêahua cuna Jesucristo nu Diose.