1 Corintios 3

1 Bee saêa enu nzeli arquiaêahua Jesucristo, chenu nzua cuna liêihua lá nia luhua xi neca bene enu chiquiê reca Stichiaê Diose, liêá unia luhua Stichiaê Diose xi neca bene enu lleênatsia reca Stichiaê Diose xi neca bee bene enu apenatsia uchili arquiê Jesucristo. 2 Unia luhua bee bedichiaê nú laca neriñaê, tucu nú rdeteê bene nichi rueê enduê meê, xne lacascaênu acunu tucu nú racu bene. Nu niê nee leca modo nia luhua xi neca bee bene enu recala Stichiaê Diose, 3 xne nehuañiscaêhua xi nehuañi beelá bee bene, ria arquiêhua lu saêhua nu rliuhua, nucuaê rlubeê nú nehuañiscaêhua xi nehuañi bee bene enu la chenala inziuê Diose. 4 Xne chenu rnihua: “Liêá neca beneê Pablo”, urre chenu leêca rnihua: “Liêá neca beneê Apolos”, ¿xieê lanu scua achee nú rriêiscaêhua tucu nú rriêi titse bee bene la? 5 Pero liêá nia luhua: ¿Nú tineca Pablo nu tineca Apolos? Rriêihua beyaê nú necaru bee enu sibiê lu Diose para nú uchili arquiêhua Diose, nu cada tucuru rriêitsia lunú uliquiê Diose nú rriêiru. 6 Nu liêá necaa xi neca tucu bene enu rduênii ebichi, nu Apolos neca xi neca enu suêe, pero Diose neca enu rriêi ruêcue. Xne liêinu necanu enu rriêi nú nzechululáhua stichiaênu. 7 Xne sia bene enu rduênii ebichi nu sia bene enu suêe lecati neca beella. Sino que Diose neca enu rriêi yeene, xne liêinu rriêinu nú rruêcu ye nú rduênii bene. 8 Leêca scua liêá cuna Apolos tucutse iguale sibiêru lu Diose, nu nediyaêru nú Diose liquiê lunú rialaru equie cuendaê riñaê nú uliquiênu nú rriêi cada tucuru. 9 Enzeêe liêá cuna Apolos tucutse sibiêru lu Diose. Nu liêihua necahua xi neca yuê Diose nú rriêiru riñaêlu, nu liêihua necahua xi neca tucu niêi nú rrecheê Diose. 10 Nu lunú chiquiê nzeêca Diose enzeêe ucañinu liêá para nú ixiuleêa stichiaênu lubee bene. Xi neca tucu bene enu riêya nú acacheê nzeêca simiendoê tucu niêi. Nu bee bene enu nzetixiuleêela Stichiaê Diose, liêibeella neca beella xi neca bee bene enu nze recheêla niêicua. Pero rquiêña nú biêya beella xneca rrecheê beellae. 11 Xne la yala cheêe beella simiendo nú urecheêlá, nu simiendo cuaê neca nú nzeli arquiê bee bene Jesucristo. 12 Nu bee bene enu nzetixiuleêe Stichiaê Diose, bee enu neca xi neca enu recheêe niêi equie simiendo, tunu recheê beellae cuna oro, plata, urre quie nú huaxi seca, urre cuna ala, urre cuna quii, urre ixi, nucuaê rni tunu seteê beella tucu nú rialane urre la zeteê beella tucu nú rialane. 13 Pero chenu riña bichia nú riêi Diose elu usticiaênu, che aca chee xa neca riñaê nú uriêibeella. Xne bichia zeêe aca preu beella xi reca preu beenú reca preu luquii para nú riêi bee bene beyaê tunu uzibiê urre lá zibiê lunú uriêi cada tucu beella. 14 Nu tunu uzibiê nú uriêilla tucu nú rrecheê tucu bene tucu niêi nú leca modo chiqui, chequie atiêlla lunú riala atiêlla lunú uriêilla. 15 Pero tunu la zibiê lunú uriêilla, che zecalla xi seca tucu bene enu riqui niê nu apenatsia silaêalla lu quii zeêe, xne tsilaêalla pero lecalí xi atiêlla. 16 Uriêihua beyaê nú liêihua necahua xi neca induê Diose, xne nzula Espíritu Santoênu cuna liêihua. 17 Tunu nuê bee bene enu rriêi nú rnitilu bee beneê Diose, chequie Diose nitilu bee benecuaê equie nú rnitilu beei induê Diose nú necaleêyala, nu liêihua necahua indu cuaê. 18 Lecati zequienu leêcatsia liêi: Tunu nuê tahua seca nú chiquiê reca elliebacuê nú nuê lu iliulabe quieê, nzalá nú aca lleêna arquiêlla lu Diose para nú deteênu nú chiquiê aca elliebacuêlla. 19 Xne ante Diose lecaxi zibiê elliebacuê bee bene iliulabe, nu tucu parte lu ichiê Stichiaê Diose rni: “La zela Diose nú chiuêu nzeêca nú rriêi tucu bene enu seca nú chiquiê netsiñia elliebacuê nú rriêilla tucu nú la neca nzeêca." 20 Leêca rni stucu parte lu ichiê stichiaênu: “Diose nediyaê nzeêcaê xneca neca elliebacuê bee bene enu seca nú chiquiê reca elliebacuê pero para liêinu lecaxi zibiê elliebacuê beella." 21 Enzeêe niêtucu bee bene la yala nú aca nelliñianu tucu bene urre stucu bene. Xne scua tucu nú nzelila arquiêhua Jesucristo yela beenú neca steneêhua. 22 Necalaru bee beneêhua, xi neca liêá Pablo, Apolos nu Pedro para nú riêiru elietsa luhua cuna Stichiaê Diose, nu neca stenelahua iliulabe, lunú nehuañi bee bene, nu eluti cuna ye beenú nuê cuna beenú entalá, ye bee nucuaê neca steneêhua. 23 Nu liêihua necalahua bee beneê Jesucristo, nu Jesucristo neca Lliêñi Diose.