1 Corintios 9
TBL1 Liêihua nediyaêhua nú nuê beyaê riêá lunú niarquia equie elurnibiyaê nú rluêcua nú necaa apóstol. Liêá ulañilá Jesucristo enu rnibiyaê luaêahua nu liêá uriêilá ana liêihua para liêinu xne uchilila arquiêhua liêinu. 2 Tunu nuê bee bene enu la chili arquiê nú necaa apóstol, pero liêihua nediyaêhua nú necaa apóstol, xne lunú nzelila arquiêhua Jesucristo nucuaê rlubeê nú neli necaa apóstol. 3 Nu lubee bene enu lachili arquiê nú necaa apóstol singuie rcuaquia lubeella: 4 Rluêcua derecho nú liquiêhua nú acua cuna nú hueêa. 5 Nu leêca nuê beyaê nú chiaa cuna tucu unaêa enu nzeli arquiê Jesucristo para nú uyalla catse elu nzaêa, tucu nú rriêi beela bee apóstol nu cuna bee bichi Jesucristo nu Pedro. 6 Nu ¿xieê liêitsia cuna Bernabé rquiêña nú riêiru riñaê eêcuru para nú huañiru, che nuê beyaê nú riêiru riñaê Diose la? 7 Pero niêtucu bee sundado enu nza lu xuu la ixiu beei gastoê beei. Nu tucu bene enu rquieni uva, ¿xieê leca modo nú aculla uva nú rquienilla la? Nu bene enu rluêcu vaca, ¿xieê leca modo nú hueêlla nichiêà la? 8 La riêihua elliebacuê nú lunú rnia luhua necatsiae elliebacuê eêcua, sino que leêca lu ley nú udeteê Diose lu Moisés rni scua. 9 Xne lu ley cuaê rni: “La duêhua ixiu lliêi uênaê chenu rriêinuhuaà riñaê.” Nu la ni nucuaê nú nzenu arquiê Diose equie cuendaê bee nañi, 10 sino que leêca nzenu arquiênu equie cuendaêahua. Xne lu ley nú udeteê Diose lu Moisés rni: Xne xi neca bene enu raêna uêna nu enu rcui trigo, rucu beella nzuculu beella nú yucu beella ulaêcu equie riñaê nú rriêibeella. 11 Nee nú uzeteêlaru liêihua nú xneca chenalahua Stichiaê Diose, ¿xieê huaxi xeêtaê neca nú rnacuêru luhua tunu riêihua elietsa luru nú xi rquiêñaru la? 12 Tunu stucu bee bene enu seteê liêihua ratiê lunú riala atiê beella nú rdeteêhua lubeella, leêca esquie liêiru máse rquiêña nú riala riêihua elietsa luru, pero mase nú scua rialane lecaxi elietsa unacuêru luhua, nu rriquiêtsiaru lunú seêcaru para nú la quieruêu bee bene nú equie cuendaêtsiaê nucuaê la zelabeella yeneê beella bedichiaê nzeêcaê Jesucristo. 13 Liêihua nediyaêhua nú ye bee uleêya enu sibiê liñi bee indu, ratiê beella lleêna uêna nú nzeyu bee bene liñi indu lu Diose para nú acubeella. Leêca esquie yebee uleêya enu sibiê luhuare elu nzeyu bee bene nañi uêna lu Diose, leêca ratiêbeella lleêna uêna nú nzeyu bee bene para nú acu beella. 14 Leêca scua uni Jesucristo lubee bene enu rixiuleêe bedichiaê nzeêcaênu, nú bee bene enu seteê beella stichiaênu, riala deteê nú xi rquiêña beella, 15 pero lua lecali xi elietsa rriêihua, nu leêca la quieêa cartaquieê luhua para nú xi liquiêhua lua. Xne para liêá máse neca nzeêca nú atia luhuare nú nuê enu axi nú ñia nzu arquia, lunú setea bee bene bedichiaê nzeêcaê Jesucristo. 16 Nu la nelliñiaa equie nú setea bee bene bedichiaê nzeêcaê Jesucristo, xne nucuaê riala nú riêá. Nu cueêa tunu la ixiuleêa bedichiaê nzeêca quieê lubee bene. 17 Enzeêe tunu rriêá riñaê quieê nú riuêtsia arquia che atia lunú liquiê Diose lua, pero lá cañia nú riêá riñaê quieê pero nucuaê utsula Diose liêá nú riêá. 18 Nu lunú rriêá ana neca nú ñia nzu arquia equie nú rixiuleêa bedichiaê nzeêcaê Jesucristo lubee bene, nu lecaxi riêá ana, tucu nú rriêi stucu bene enu rixiuleêe bedichiaê nzeêcaê Jesucristo ana. 19 Mase nú lecati rnibiyaê lua lunú rriêá, pero caêa nzua para nú sibiêa lu ye bee bene para nú riêá ana nú aca huaxila bee beneê Jesucristo. 20 Nu chenu nzucuaêa cuna bee bene Israel, nehuañia tucu nú nehuañi beella para nú riêá ana nú aca beella beneê Jesucristo. Chenu nehuañia cuna beelá bee bene enu neli nzenala ley nú udeteê Diose lu Moisés. Che nehuañia tucu nú nehuañi beella, para nú riêá ana nú aca beella beneê Jesucristo, mase nú nediya nu la nibiyaê ley cuaê lua. 21 Nu chenu nzucuaêa cuna bee bene enu laca bee bene Israel, bee enu la chenala ley, nehuañia tucu nú nehuañi beella para nú riêá ana nú aca beella bee beneê Jesucristo, mase nú nediya nú Diose neca enu rnibiyaê lua xne nehuañia tucu nú rnibiyaê Jesucristo. 22 Chenu nzua cuna bee bene enu nzu chiucu arquiê equie nú xi racu, rlaênaa nú rriêá tucu nú rriêi beella para nú riêá elietsa lubeella nú acabeella beneê Jesucristo. Nu catse elu nzaêa rriêá tucu nú rriêi beella, che scua tucu modo urre stucu modo riêá ana nú tsilaêa chiucu chuna beella equie cuendaê Jesucristo. 23 Ye bee nucuaê rriêá equie eluseca nú rluêcua equie cuendaê bedichiaê nzeêcaê Jesucristo, para nú liêá cuna ye bee bene enu nzeli arquiê Jesucristo, iguale atiaêahua lunú xi liquiê Diose luaêahua. 24 Liêihua nediyaêhua nú chenu riecaxuêu huaxi bene, tucutsia enu riecaxuêulá nzeêe rriêi ana premio. Enzeêe leêca nee uduêhua ana arquiêhua para nú atiêhua premio nú liquiê Diose luhua. 25 Ye bee bene enu riecaxuêu rduê beei ana arquiêbeei para nú lecaxi rcaa nú yecaxuêu beei, rriêi beei scua para nú atiê beei tucu premio, pero rnitilu premio cuaê, pero liaêahua rriaêahua scua para nú atiaêahua tucu premio nú leca xunga nitilu. 26 Nu liêá nediya nzeêcaa lunú rriêá, nu la riêá xi rriêi tucu bene enu nzexuêu nu la riêi beyaê cariña. Leêca la riêá xi rriêi tucu bene enu la riêi beyaê ca richiu penete. 27 Para nú aca riêá lunú riala riêá xne canu liêá enu setea bee bene bedichiaê nzeêcaê Jesucristo lecaxi atia ante Diose.