1 Pedro 4

1 Enzeêe tucu nú nehuana ulleêca Jesucristo, leêca scua rquiêña nú nehuana zecahua. Xne equie nú nehuana zeca bene scua sanaê arquiê bene bee dula, 2 para nú riêilla tucu nú riuê arquiê Diose diqui lunú nehuañilla, luhuare nú riêilla lunú necha neca rleêlla. 3 Liêihua huaxi tiembu uhuañihua tucu nú uhuañi bee bene enu la chulu Diose. Uhuañitsiahua tucu nú niarquiêtsiahua cuna tucu nú necha neca rleêhua, ulluchiêhua nu uriêihua eliñi nú lecaxi zibiê, ulluchiêtsiahua hasta elu niarquiêhua, nu udeteêhua ulaêna lu beenú la neca diose nú xiña arquiê Diose. 4 Pero nee lunú la chequiehua nú huañihua tucu nú uhuañi bee bene enu rriêi scua, chequie nzenu arquiêbeei lu cuendaêhua nu seêta beei liêihua. 5 Pero liêibeei rquiêña nú deteêbeei cuenda lu Diose lunú uriêibeei, liêinu enu nzu para nú hualue lu cuendaê bee bene enu nehuañi cuna lu cuendaê bee bene enu unguti. 6 Xne leêca ubeneê bee bene enu unguti Stichiaê Diose chenu uhuañi beella lu iliulabe quieê, añinzuca nú unguti beella xi unguti beelá bee bene iliulabe, pero para Diose nehuañi beella equie cuendaê espírituê beella. 7 Nee nzeêta axula nú laxu iliulabe. Enzeêe udeêteê llieêehua elliebacuêhua nu ucuaêa tsiñiahua para nú acahua nacuêhua lu Diose diquinuê arquiêhua. 8 Nu la zañiêhua nú zecahua bee saêhua tucu nú rialane, xne eluseca cuaê neca nú rriêi elietsa nu la ducheêhua liñi arquiêhua nú rlehua lubee bene añinzuca nú huaxi beenú necha neca rriêinu beei liêihua. 9 Udeêtehua elu yaêna bee saêhua enu rriña niêhua sin nú leehua lubeella. 10 Cada tucuhua lia uliquiê Diose lunú recahua para nú riêihua lunú rquiêña riêihua, enzeêe uriêihua elietsa lubee saêhua lunú acahua riêihua para nú acachee nú rriêicahua tucu nú riala nú riêihua cuna lunú lia uliquiê Diose lunú recahua. 11 Tunu nuê tucuhua enu rluêcu nú lia udeteê Diose nú recalla para nú zeteêlla bee saêlla, rquiêña nú zeteêlla tucu nú neca Stichiaê Diose. Leêca enu rluêcu lunú lia udeteê Diose lunú recalla para nú riêilla elietsa lubee saêlla, rquiêña nú duêlla juerzaêlla lunú lia udeteê Diose lulla para nú riêilla elietsa lubee saêlla. Ye nú rriêihua uriêi nzeêcahua para nú ni nzeêca bee bene lu Diose equie cuendaê Jesucristo, liêinu enu riala ulaêna cuna elurnibiyaê diqui tiembu. Amén. 12 Bee saêa enu nzeli arquiaêahua Jesucristo enu chiquiê seêca, la lliquihua equie nú chiquiê nehuana secahua xne nucuaê neca tucu prueba para liêihua, la chenu arquiêhua equie nú secahua scua. 13 Aêla ñia utsu arquiêhua chenu nuê nú nehuana secahua tucu nú nehuana ulleêca Jesucristo para nú leêca ñia tsu arquiêhua lañiêhua ellieê Jesucristo bichia nú riña zecanu stucu bese. 14 Ãia nza lu cuendaêhua chenu rquiexu bee bene liêihua equie nú nzequiehua Jesucristo, xne ye bichia nzu Espíritu Santoê Diose cuna liêihua. Liêinu enu rluêcu nú rnibiyaê. 15 Lecaxi zibiê nú nehuana secahua, tunu unguutihua bene urre rriêihua eluhuanaê, urre rriêihua nú necha neca, urre riuêuhua elu la yala nú chuêuhua. 16 Pero tunu nuê bene enu nehuana seca equie nú nzequiella Jesucristo, la yala nú tuêlla sino que aêla deteêlla cheêtsa lu Diose equie nú necalalla beneênu. 17 Uriêihua beyaê nú sela Diose nú nehuana seca bee beneênu para nú ninu lubeella, tunu liaêahua nú necaêahua beneênu nu seêcaêahua scua, ¿xa zeca bee bene enu la niarquiê zucuê bedichiaê nzeêcaê Diose che? 18 Tunu liêi bee bene enu neli nzequie inziuê Diose chiquiê huaxi nú nehuana zeca beella para nú riña beella lu Diose, ¿xa zeca bee bene enu rriêi dula cuna bee enu la duê equie nú rni Diose che? 19 Enzeêe bee bene enu sanaê arquiê Diose lunú nehuana seca beella, rquiêña nú che riêilá beella lunú neca nzeêca, nu tsaêna beella espírituê beella ya Diose, liêinu enu urecheêe liaêahua nu siempre saêalunu stichiaênu.