1 Pedro 3

1 Leêca scua liêihua bee unaêa enu nechiala, uzuêcuêhua nu rni bee niyuêhua para nú tunu tucu bee niyuêhua enu la niarquiê chili arquiê Stichiaê Diose, pero chenu lañiêbeei nú xa nehuañihua, nu rluêcuhua ulaêna lubeei. Che chili arquiêbeei Stichiaê Diose sin nu nihua lubeei. 3 Equie nú sucheêhua la dete xeêtaêhua, la tsucheê xeêtaêhua equiehua, nu la riêitsiahua elliebacuê nú quiêñahua puro nú neca bee oro urre utuhua puro laquie nú huaxi seca. 4 Mejora ucuaênahua nú aca nzeêca arquiêhua lu Diose cuna nu aca nzeêcahua nu aca lleêna arquiêhua bee nucuaê leca bichia nú nitilu, xne nucuaê neca nú máse seca lu Diose. 5 Xne scua uhuañi bee unaêa enu uyaquie inziuê Diose hasta huaêtu, nu uchili arquiêbeella Diose nu uzucuê beella nu rni niyuê beella. 6 Scua uriêi Sara, uzucuêlla nu rni niyuêlla Abraham nu cuna ulaêna unilla lu niyuêlla “Detá”. Nee necahua xi neca xinchiuêcu Sara, tunu rriêihua nú neca nzeêca sin nu lliquihua. 7 Leêca scua liêihua bee niyu, uhuañi nzeêcahua cuna bee unaêhua. Xne mase necachi beenchu lubee niyu, nu leêca riala beenchu elunehuañi nú leca xunga laxu nú lia rliquiê Diose equie nú nzeêcanu. Scua uhuañihua para nú riêi caso Diose stichiaêhua chenu rnacuêhua lunu. 8 Enzeêe nia luhua nee, uhuañi nzeêca yehua cuna bee saêhua aca tucu necatsehua, nu uriêihua tucutsia elliebacuê, uzecahua bee saêhua xi neca bichihua. Aca nzeêcahua nu aca lleêna arquiêhua. 9 La guseêehua tucu nú necha neca uriêinu bee bene liêihua, nu la quiexuhua bee bene enu rquiexu liêihua. Aêla unacuêhua lu Diose para nú riêinu elietsa lubeei, xne para enzeêe ucañi Diose liêihua para nu rialahua elietsa nu rliquinu. 10 Xne lu ichiê Stichiaê Diose rni: Enu niarquiê nú huañi nzeêca cuna nu ñia neca, rquiêña nú biêyalla nú la nilla bedichiaê nu necha neca cuna nú la nilla eluquichiaê. 11 Rquiêña nu tsanaê arquiêlla beenú necha neca, nú riêilla nú neca nzeêca, nu cuaênalla nú huañi nzeêcalla cuna bee saêlla nu chequieella nú huañilla scua. 12 Xne rriucu Paêahua Diose bee bene enu neli rriêi tucu nú niarquiênu, nu rriêi casonu stichiaê beella chenu rnacuê beella lunu, pero rleenu lubee bene enu rriêi nú necha neca. 13 Lecati riêi nu necha neca luhua, tunu rcuaênahua nú riêihua lunú neca nzeêca. 14 Pero ñia nza lu cuendaêhua tunu rriêi bee bene nú nehuana secahua, xne rriêihua tucu nú rialane. La quiêña nú chenu arquiêhua nu lliquihua equie cuendaê nucuaê, 15 sino que uluêcuhua ulaêna nu uzuêcuêluhua lunú rni Jesucristo. Utsutsiñahua para nú cuaquihua lubee bene enu rnidichiaê luhua equie cuendaê nú nzeli arquiêhua Jesucristo, pero ucuaqui nzeêcahua cuna bedichiaê nzeêca lubeei. 16 Uhuañi nzeêcahua para nu acahee nu la nchiñi nú necha neca elliebacuêhua para nú tuê bee bene enu seêta liêihua equie nú nzeli arquiêhua Jesucristo, cuna nú nehuañihua tucu nu rialane. 17 Xne máse neca nzeêca tunu nehuana zeca bene equie nú rriêilla nú neca nzeêca tunu tsanaê Diose nu acane scua, luhuare nú nehuana zecalla equie nu rriêilla nú necha neca. 18 Xne hasta liêi Cristo nehuana ulleêcanu, nu ungutinu tucutsia bese equie cuendaê stulaêahua, añinzuca nú né riêinu dula, pero ungutinu equie cuendaêahua liaêahua enu neca bee bene enu rluêcu dula para nu neca nzeêca arquiaêahua lu Diose. Ungutinu xi neca tucu bene iliulabe, pero uhuañi zecanu equie cuendaê Espírituênu. 19 Pero ante nú huañi zecanu, uyaniê Espírituênu lu espírituê bee benenguti elu nchiñicheêbeei. 20 Bee espíritu cuaê neca bee bene enu né zucuê nu uni Diose, tiembu nu uhuañi Noé lu iliulabe quieê, nu uriquiê Diose liêibeei diqui tiembu nu urecheêe Noé barco. Nu xunu tsia neca bee bene enu utsilaêa lu inza bichia zeêe. 21 Inza zeêe neca tucu seña equie cuendaê elu rrinza nú rlucuaêahua nee, nu rlubeê nucuaê nú utsilaêa Diose liaêahua. Nu la ni nucuaê nu neca elu rrinza nú quiee lunú neca cuerpoêahua, sino para nu nacuaêahua lu Diose nu lá llutse nu necha neca elliebacuaêahua lunu, equie nu rluêcuaêahua elunehuañi nú necuqui neca, equie cuendaê nú uhuañi zeca Jesucristo. 22 Liêinu enu uquie liñibe nu nzucunu cueêtse Diose chubee elurnibiyaê bee ángele, cuna bee espíritu nu rluêcu elu usticia cuna nú rnibiyaê.