1 Timoteo 4

1 Neli unila Espíritu Santo nú nzeêta bichia nú nuê bee bene enu tsanaê arquiê lunú nzeli arquiê Jesucristo, nu máse rriêi beei caso lunú rni bee bene enu sequienu bee bene cuna ye beelá nú nzeêta lu bezeêlu. 2 Liêibeei maselá rriêi caso beei stichiaê bee bene enu niquichiaê nu sequienu bee bene, bee benecuaê neca enu la tsiaê lunú rriêi beei dula xne nuêbeyaêlaê beei nú rriêibeei scua. 3 Bee benecuaê rnibeei nú la yala chia bee bene, cuna nú nuê bee elubacu nú leca modo nú acu bee bene, pero uduê Diose ye clasiaê bee elubacu para nú acu bee bene enu nzeli arquiê liêinu, liêibeella enu nuêlu lunú neli neca nu deteêbeella cheêtsa lunu. 4 Xne ye nú urecheêe Diose neca nzeêcae, nu la yala nú niêahua nú nuê nú la neca nzeêca, tunu deteêahua cheêtsa lu Diose chenu nzetaêcuaêahuane, 5 xne chenu rnacuaêahua lu Diose, liêinu rriêileêyanu cuna stichiaênu equie nú rdaêcuaêahua. 6 Tunu liêilu seteêlu bee bene enu nzeli arquiê Jesucristo tucu nú unilá lulu, che sí necalu enu neli sibiê lu Jesucristo tucu nú rialane, scua nzeacalálu maselá lunú recalalu cuna lunú nzeli arquiêlu, cuna bee bedichiaê nzeêca nú nzequieelu. 7 La riêilu caso bee cuento nú xela arquiê bee bene beenú la neli neca, mejora uquia quietsia nú acalálu nú tsutaê arquiêlu nú huañilu tucu nú niarquiê Diose nú huañilu. 8 Neca nzeêca nú rriêi bee bene ejercicio para nú aca naaqui cuerpoêlla, pero lu yeene máse sibiê nú nzutaê arquiaêahua lu Diose, xne tucu nú sibiê nucuaê lu iliulabe quieê leêca scua zibiêi liñibe elu huañi liêahua. 9 Neli neca bee bedichiaê cuaê, nu ye bee bene riala nú chili arquiê liêi. 10 Enzeêe mase seêcaêa lunú seêcaêa, pero nzeriêilá lunú riêá, equie nú nzeli arquiaêa Diose enu nehuañi, liêinu enu silaêa ye bee bene. Pero máse necane para bee bene enu nzeli arquiê liêinu. 11 Nucuaê neca nú riala zeteêlu bee bene cuna nu nibiyaêlu lubeei nú zucuê beei bee nucuaê. 12 Ubiêya liêilu para nú la ni bee bene nu la zibiêlu equie nú nereêneêlu, rquiêña nú acalu tucu ejemplu lubee bene enu nzeli arquiê Jesucristo equie nú xa rdichiaêlu nu xa nehuañilu, cuna nú secalu bee bene cuna nu xa nzeli arquiêlu Jesucristo, cuna nú xa rriêilu elliebacuê nzeêca. 13 Diqui nú nzelabiêya liêilu ulaê Stichiaê Diose lubee bene, nu niê bezeteê lubeei nu zeteêlu liêibeei lunú rni Stichiaê Diose. 14 Ubiêya nú uliquiê Diose lulu tucu nú uni bee beneê Jesucristo enu rnibiyaê equie cuendaêlu chenu uricuê beella yabeella equielu, chenu uriêi beella beyaê nú necalu bene enu ucañi Diose. 15 Uzuêcuêlutsia nú riêilu ye bee nucuaê nu utsutaê arquiê lue para nú lañiê ye bee bene nú xa nzequielu inziuê Diose. 16 Ubiêya liêilu nu ubiêya lunú xa seteêlu bee bene, nu uquia quieelá lunú nzutaê arquiêlu lu ye nu nediyaêlaêlu, scua tsilaêalu liêilu nu tsilaêa bee bene enu rieneê lunú seteêlu.