1 Timoteo 6
TBL1 Bee bene enu neiqui lu stucu bene rquiêña nú luêcu beella ulaêna lubee patrónê beella, para nú la ni condra bee bene Diose cuna stichiaênu nú seteêahua. 2 Nu tunu leêca patrón beella nzeli arquiê Jesucristo, rquiêña nú máse luêcu beella ulaêna lu bene zeêe, xne tucutse nzeli arquiêbeella Jesucristo, leêca rquiêña nú riêi beella riñaê tucu nú rialane, xne sibiê beella lubee saêbeella enu leêca nzeli arquiê Jesucristo. Scua zeêteê bee bene nu niê lubeei nú riêibeei scua. 3 Tunu nuê tucu bene enu seteê bee bedichiaê nú la neca tucu nú neca stichiaê Jesucristo nu niê nú xa nzeli arquiaêahua Jesucristo la zeteêlla bee bene, 4 liêilla necalla tucu bene enu rutiê nu lecaxi reca. Riuêtsia arquiêlla nú rliunulla bee saêlla, chequie zeêe rquixie nú ria arquiê bee bene lu saê bee bene, cuna nú rana arquiê bee bene saê bee bene, cuna nú rquiexu bee bene bee saê bee bene nu la luêcu bee bene confianza lu saê bee bene, 5 bee bene enu neca scua, la tsuxe beei nú rliu beei equie ye beenú la zibiê nchiñi elliebacuêbeei, xne la riêi beei beyaê lunú neli neca, che rriêi beei elliebacuê equie nú chili arquiêbeei Jesucristo aca xene beei. Bee bene enu neca scua uchiuêuchu lubeei nu la quieteêlu beei. 6 Neli nu chiquiê xene bee bene lunú nzeli arquiêlla Jesucristo, pero bee bene enu neca conforme lunú rluêcutsia. 7 Xne lecaxi ubela yuaêahua lu iliulabe quieê, nu lecaxi uyaêahua chenu atiaêahua. 8 Tunu rluêcuaêahua nú daêcuaêahua, nu rluêcuaêahua nú utuaêahua cuna nucuaê rquiêña nu aca conformeêahua. 9 Pero bee bene enu niarquiê nú aca xene lu iliulabe quieê la riquiê beei nú tsutaê arquiêbeei sino que chu rriêi bezeêlu ana lubeei cuna nú la riêibeei ana lu elliebacuê nú necha neca rriêi beei, nu rriêibeei tucu nú la yala riêi beei, nucuaê rriêi nú nitilu beei. 10 Xne lunú rleê bee bene nú luêculla dimi, zeêe rquixie ye beenú necha neca, nu nuê bee enu rleê dimi utsanaê arquiêbeei lunú nzeli arquiêbeei Jesucristo, che leêcatsia liêibeei rriêibeei nú nehuana seca beei. 11 Pero liêilu Timoteo beneê Diose, uchiuêuchuu lubee nú necha necacuaê, ucuaêna nú huañi nzeêcalu tucu nú niarquiê Diose nú huañilu, uchili arquiê liêinu, nu utsuquie arquiê, nu uzeca ye bee bene, cuna nú aca lleêna arquiê. 12 Ucuaêna nú tsutaêli arquiêlu lunú nzeli arquiêlu Jesucristo. La tsanaêlu nú nitilu elunehuañili nú luêculu liñibe xne para enzeêe uduê Diose liêilu, nu nilu lu huaxi bee bene xa nzeli arquiêlu Jesucristo. 13 Lu Diose enu rliquiê nú nehuañi ye beenú nuê lu iliulabe, nu equie cuendaê Jesucristo liêinu enu né lliqui uni lunú neli neca lu Poncio Pilato, nibiyaêa lulu, 14 nú zucuêlu nú riêilu lunú rnia lulu, nu uriêi tucu nú neli neca para nú la ni bee bene nú la riêilu tucu nú neli neca, scua uriêi hasta bichia nú riña zeca Jesucristo. 15 Nu nzeêtanu bichia chenu nibiyaê Diose nú nzeêtanu, liêi Diose enu riala ye nú neca ulaêna, nu tucutsia liêinu necanu Diose, nu rluêcunu ye poder, liêinu necanu Arre lubee arre nu Rnibiyaênu lu ye bee enu rnibiyaê. 16 Liêinu necanu enu leca xunga ati, nu nzucunu lu ellieêe nú rulu siquiê elu lecati chébica. Niê tucu bee bene lascaê lañiê liêinu, nu laca lañiê bee bene liêinu. ¡Liêinu chiquiê rialanu huaxi ulaêna, nu leca xunga laxu poder nú rluêcunu! Amén. 17 Bee bene enu neca bene xene lu iliulabe quieê, uniê lubeella nú la utiê lliñia beella, cuna nú la riêi beella elliebacuê nú la laxu nú rluêcu beella, xne bee eluxene nú rluêcu bee bene rlaxue, mejora nú zucuêlutsia beella Diose enu nehuañi, xne liêinu necanu enu chiquiê rliquiê ye nú seêcalaêchaêahua para nú ñia tsu arquiaêahua. 18 Uniê lubeella nú riêi beella lunú neca nzeêca, cuna nú riêi beella huaxi beenú neca nzeêca, cuna nú ñia nzu arquiêbeella deteê beella xi secalaêchaê bee bene nu riêi beella elietsa lubee bene, 19 xne scua rquieteê saê beella eluxene nú riêi elietsa lubeella lubee bichia nú enta, para nú luêcu beella nú huañili beella liñibe. 20 Timoteo la zañiêlu riêilu lunú uyaêna cuendaêlu nú riêilu, la riêilu caso bee bedichiaê nú la zibiê nú nuê lu iliulabe quieê, niê bee eluquichiaê, nu niê bee bedichiaê nú rni bee bene enu rni nú chiquiê reca, pero la neli nú reca beei. 21 Xne nuê bee bene equie nú rriêi beei caso bee nucuaê, utsanaê arquiêbeei nú nzeli arquiêbeei Jesucristo. Diose riêi nú cha nzeêca lu cuendaê yehua nee Timoteo. Amén.