2 Timoteo 4

1 Lu Diose nu lu Jesucristo, liêinu enu nzeêta xi neca tucu arre para nú hualunue lu cuendaê bee bene enu nehuañi cuna lu cuendaê bee bene enu unguti, nia lulu 2 udixiuleêe Stichiaê Diose lubee bene, nu chiquiê ulaêna xa modo nilu stichiaênu lubeei sia chenu nuê beyaêe nu sia chenu leca beyaêe, uriêi nú chili arquiêbeei lunú rnilu, nu uquiêyaê bee bene enu la zucuê nú rnilu, nu uniê bezeteê lubee bene nu uzeêteê liêibeei, nu uluêcu paciencia liêibeei. 3 Xne riña bichia nú la zelaê bee bene yeneê beei bedichia nú neli neca, riêitsia beei lunú riuêtsia arquiêbeei, nu cuaêna beei huaxi bee bene enu zeteê liêibeei lunú riuêtsia arquiêbeei yeneê beei. 4 La riaêbeei caso lunú neli neca, riêitsia beei caso lunú xelatsia arquiê bee bene. 5 Pero liêilu Timoteo ubiêya liêilu nu uhuañi nzeêca lu ye nú rriêilu, uriquiê xitse lunú nehuana secalu, nu udixiuleêe bee bedichiaê nzeêcaê Jesucristo, uriêi lunú uliquiê Diose lulu nú riala riêilu. 6 Xne yamero uti bee bene liêá, nu yamero tsaêna iliulabe quieê. 7 Utsutaê arquia lu Stichiaê Diose añinzuca nú ulleêca lunú ulleêca, ulaêxulá uriêá lunú riala riêá, nu né tsana arquia lunú nzeli arquia Jesucristo. 8 Nee nzuquiela premio nú rialaa liñibe, neca premio cuaê nú liquiê Jesucristo lua chenu riña bichia zeêe, liêinu enu rriêi elu usticia tucu nú neli neca. Nu la liquiêtsianu premio cuaê lutsia, leêca deteênue lu ye bee bene enu ñia nzuquie arquiê chenu enta zecanu. 9 Uriêi juerza nú chu yeêta biêyalu liêá, 10 xne utsanaê arquiêla Demas liêá equie nú máse niarquiêi beenú nuê lu iliulabe quieê, nu nzalai lu eyeche Tesalónica. Nu Crescente nzala lu iliu Galacia, nu Tito nza lu iliu Dalmacia. 11 Stucutsia Lucas nzu cuna liêá. Chenu nzeêtalu yeêta yuulu Marcos xne liêilla recalla riêilla elietsa lua nú ixiuleêeru Stichiaê Diose. 12 Nu Tíquico uxeêla lu eyeche Efeso. 13 Chenu nzeêtalu yeêta yuulu capa nu utsaêna eyeche Troas niêi Carpo, leêca yeêtayulu bee libroa, nu la zañiêlu yeêta yuulu bee ichia. 14 Alejandro enu neca bichicuê huaxi nú necha neca uriêinui liêá, pero lu Diose ixiui ye nú uriêinui liêá scua. 15 Ubiêya liêilu lunú xa rriêi, xne chiquiê rriêi condrai bee bedichiaê nú rixiuleêa. 16 Bese rlu nú uhualu bee usticiae lu cuendaa, lecati uriêi elietsa lua, yebeella utsanaê arquiêbeella liêá alaê lá duê cuenda Diose lunú uriêinu beella liêá scua. 17 Pero Jesucristo uriêi elietsa lua, nu uliquiênu nú utsu naaqui arquia para nú utsalua nú udixiuleêa stichiaênu, nu ubeneê ye bee bene enu la neca bee bene Israel nucuaê, scua utsilaêa Diose liêá tucu nú silaêa bene lu bichee. 18 Nu Jesucristo tsilaêa liêá lu ye lunú necha neca, nu liêinu riêi ucunu liêá hasta bichia chenu riñaa liñibe elu rnibiyaênu. ¡Liêinu rialanu huaxi ulaêna diqui tiembu nú leca xunga laxu! Amén. 19 Uriêi saludar Prisca cuna Aquila, nu cuna bee familiaê Onesíforo. 20 Erasto uyaêna eyeche Corinto, nu Trófimo riti utsaêna eyeche Mileto. 21 Uriêi juerza nú chu yeêtalu ante nú riña tiembu nú aca nucuaa. Eubulo, Pudente, Lino, Claudia, cuna ye beelá bee saêahua enu nzeli arquiê Jesucristo, xeêla beella saludo lulu. 22 Jesucristo riêinu elietsa lulu, nu riêinu nú cha nzeêca lu cuendaê yehua. Amén.