Santiago 4

1 ¿Cá nzeêta nú rlehua lubee saêhua cuna nú rliuhua? ¿Xieê la yeêta nucuaê lu elliebacuê nú necha neca rriêihuala? 2 Liêihua rleêhua nú luêcuhua lunú la luêcuhua, nu hasta ruuti saêhua para nú luêcuhua lunú niarquiêhua, leêca riaa arquiêhua lubee saêhua, nu tunu la luêcuhua lunú rluêcu bee saêhua, chequie rquixie nú rlehua lubee saêhua, cuna nú rliuhua, pero neli nú la luêcuhua lunú niarquiêhua, xne la nacuêhuane lu Diose. 3 Nu tunu rnacuêhua lunú niarquiêhua lu Diose, la yucuhuane xne la nacuêhuane lunu tucu nú neca nzeêca, rnacuê tsiahuane lunu para nú huañitsiahua tucu nú neca elliebacuêhua nú necha neca. 4 Liêihua la aca neli nú secahua Diose. ¿Xieê la riêihua beyaê nú tunu nzequiehua lunú necha neca nuê lu iliulabe quieê, sucuê ruêuhua lu Diose la? Enzeêe enu niarquiê nú chequie beenú necha neca nuê lu iliulabe quieê, che leêca liêilla rriêilla nú sucuê ruêulla lu Diose. 5 Xne la lianitsia lu ichiê Stichiaê Diose elu rni: “Espíritu Santo nú uduê Diose arquiaêahua, chiquiê niarquiênu nú zecaêahua Diose." 6 Nu chiquiê huaxi seca elietsa nú rliquiê Diose luaêahua, tucu nú nequie lu ichiê stichiaênu elu rni: “Diose rriêi elietsa lubee bene enu lleêna arquiê lunu.” Pero la riêi casonu bee bene enu nelliña. 7 Enzeêe uzuêcuêhua Stichiaê Diose. Utsutaê arquiêhua para nú la riêi bezeêlu ana luhua, nu scua tsanaê arquiêi liêihua. 8 Uquiabicahua lu Paêahua Diose, nu che riêi casonu liêihua. Utsanaê arquiêhua stulahua, liêihua bee bene enu rluêcu dula, liêihua enu saê arquiê nú nzequie inziuê Diose, diquinuê arquiêhua uquia quiehua inziuênu. 9 Uquianu arquiêhua nu utsu nehuana arquiêhua, nu unaêhua equie cuendaê stulahua. Luhuare nú xiêchihua unaêhua, nu luhuare nú ñia nzu arquiêhua utsu nehuana arquiêhua. 10 Aca lleêna arquiêhua lu Paêahua Diose, nu liêinu zucuê ayanu liêihua. 11 Bee saêa enu nzeli arquiaêahua Jesucristo, la zeêtahua bee saêhua, xne bee bene enu seêta bee saê nu rlualulla lu cuendaê bee saêlla, liêilla seêtalla bee saêlla cuna nú rlualulla lunú neca leyê Diose. Nu tunu liêihua rlualuhua nú neca leyê Diose, liêihua rnibiyaêhua lu ley cuaê, luhuare nú zucuêhua lunú rnii. 12 Tucutsia Diose uduê ley nu liêinu necanu enu rluêcu nú rnibiyaê para nú tsilaêanu bee bene, cuna nú deteênu castiya bee bene. Pero liêilu, ¿ti necalu nú rlualulu lu cuendaê bee saêlu? 13 Nee uquieêe diacahua liêihua bee enu rni: “Nee urre yeêe chaêahua tucu ciudad urre stucu ciudad, nu zeêe lluaêahua tucu lana nu riaêahua bee berexe, cuna nú riaêahua ana huaxi dimi”, 14 nu niê temeê la riêihua beyaê xi nzu aca yeêe. Xne elunehuañi nú rluêcuaêahua neca xi neca gú, nú nuêe terratu nu sterratutsia rnitilue. 15 Lunú riala nihua: “Tunu liquiê Diose nú nehuañiaêahua riêahua ninguieê urre riêahua ninguie." 16 Pero liêihua máse nzequiehua stichiaêhua nú nelliña, nu ye bee clasiaê bee elulliña cuaê necha neca. 17 Enzeêe bene enu nediyaê nú xi riala riêilla nu la riêillae, rriêilla dula che.