Santiago 5

1 Nee, ¡uquieêe diacahua liêihua bee bene xene! ¡Unaêhua nu ubixialihua equie nú nehuana zecahua nu cuna nú tsiêhua! 2 Bee eluxeneêhua rlaxulane, nu bee xucuhua racula bee belalaê. 3 Bee oro cuna bee plata nú rluêcuhua ruchila bee. Ye bee nucuaê rlubeê lunú necha rriêihua, nu leêca liêibee nucuaê laêxue liêihua tucu nú rriêi quii. Lecaxi zibiê nú uducheê tsiahua eluxene cuaê para bichia chenu hualu Diose lu cuendaê bee bene. 4 Ubiêyacuruhua, bee mosoê enu uriêi riñaêhua, rnacuê beella luhua nú ixiuhua beella, nu hasta Diose enu rluêcu ye nú rnibiyaê ubeneêlaê lunú xanabitsi beella. 5 Liêihua nehuañihua lu iliulabe quieê tucu nú niarquiêtsiahua nu rriêihua tucu nú riuê arquiêhua, pero rriêitsiahua nú rruêcu nucuaê arquiêhua lunú lecaxi zibiê para bichia nú hualu Diose lu cuendaê bee bene. 6 Nu hasta ucuaênahua xa modo unguti bee bene enu lecaxi uriêi sin nú azucuê ruêu beella luhua chenu unguti beella. 7 Nee, bee saêa enu nzeli arquiaêahua Jesucristo, uluêcuhua paciencia hasta bichia chenu riña Jesucristo enu rnibiyaê luaêahua. Tucu nú rluêcu bene enu rriêi riñaê lu yuu paciencia desde chenu rquixie rlaca quiu nu hasta nú rdete ruêu quiu para nú riuculla ulaêcuêlla. 8 Leêca scua liêihua uluêcuhua paciencia nu la llacaêhua, xne la leaê nú nzeêta zeca Jesucristo enu rnibiyaê luaêahua. 9 Leêca nia luhua nú la xana bitsiaêhua lu cuendaê bee saêhua para nú la yalahua niê tucu castiya, xne axula nzu nú riña liêinu enu hualue lu cuendaê bee bene. 10 Uquia quiehua tucu nú uriêi bee profeta enu udixiuleêe tucu nú uni Diose lubeella, uluêcu beella paciencia nu uriquiê beella lunú nehuana ulleêca beella. 11 Liêihua nediyaêhua nú ñia nza lu cuendaê bee bene enu rriquiê lunú nehuana seca. Ubeneêlaêhua xa uriquiê Job lunú nehuana ulleêcalla, nu leêca nediyaêhua xa uriêi Diose lulla chenu ulaxu nú ulleêcalla scua, xne ruaêa arquiê Diose bee bene cuna nú rluêcu arquiênu bee bene. 12 Pero ubiêyahua chenu rdichiaêhua urre chenu rriêihua tucu compromiso cuna bee bene, la yala nú quieêehua Diose, urre stucu nú rene para nú la zecahua castiyaêhua, mejora uniêhua nú esquie necane tunu esquie necane, nu uniêhua nú la acane esquie tunu lacane esquie. 13 Tunu nuêhua enu nehuana seca, rquiêña nú nacuêlla lu Diose para nú riêinu elietsa lulla. Nu tunu ñia nzu arquiê tatse tucuhua ula nzeêe canto lu Diose. 14 Nu tunu nuêhua enu riti, bixia nzeêe bee saêahua enu rnibiyaê leta bee saêahua enu nzeli arquiaêahua Jesucristo, para nú nacuê beella lu Diose equie cuendaê bene zeêe nu duê beella aceite equie bene zeêe lunú lee Jesucristo. 15 Chenu rnacuê beella lu Diose equie cuendaê bene enu riti zeêe nu nzu teneli arquiêbeella lunu, che yecaê bene enu riti zeêe, nu riêiyeca Diose liêilla, nu tunu nuê dula nú uriêilla riêi Diose perdona liêilla. 16 Enzeêe utsiruêuhua bee dula nú uriêihua lubee saêhua, nu unaêcuêhua lu Diose lu cuendaê bee saêhua para nú yecaêhua. Xne bene enu neca nzeêca arquiê lu Diose chenu rnacuêlla lunu, rriêinu caso liêilla. 17 Tucu nú ulleêca profeta Elías ungalla tucu bene tucu nú necaêahua, chenu uziquiella nu unacuêlla lu Diose nú la laca quiu, che né laca quiu chuna lana arulaê. 18 Nu chenu unacuê zecalla lu Diose nú laca quiu, che uquixie nú ulaca quiu nu unguyuê zeca beenú unguyuê luyuu. 19 Bee saêa enu nzeli arquiaêahua Jesucristo, tunu nuê ta tucuhua enu xiuêuchu inziuê Diose, nu stucuhua riêi nú benchilaê zecalla inziuê Diose. 20 Uriêihua beyaê nú tatse tucuhua enu rriêi nú benchilaê zeca tucuhua inziuê Diose para nú la chequiaêlla inziu nú necha neca, utsilaêalla nzeêe lu castiyaê nzeêe nu uriêilla nú unga perdona huaxi stula nzeêe che.