Apocalipsis 20

1 Chequie ulañia nú enta laca tucu ángele enza liñibe nu nzenenu liave ebila, nu leêca nzenenu tucu cadena llene. 2 Nu unaêtse ángele zeêe dragón enu neca serpiente huaêtu lee bezeêlu nu benechiquiê ullicaêcuu ángele zeêe liêi cuna cadena diqui neca tucu mili lana. 3 Che utsiêqui ángele cuaê bezeêlu ebila nu utsacuêtaênu ruêu ebila zeêe para nu la chiuaê bezeêlu zequienu arquiê bee bene iliulabe hasta nú zaê tucu mili lana, che chiuêu zecai ebila lleêna tiembu. 4 Nu ulañia bee xleta nú rnaa xi rnaa xletaê arre, lu xleta zeêe nucuaêa bee bene enu ungutiê poder para nú lualue lu cuendaê bee bene. Leêca ulañia espírituê bee bene enu uchiecuê bee bene lluca equie, equie nú udixiuleêe beella Stichiaê Diose nu cuna equie cuendaê Jesucristo. Nu liêibeella né luêcu beella ulaêna lu monstruo zeêe niêlu imagenêí nu lá zela beella nú aquie señaê monstruo zeêe tequie beella urre yabeella. Nu ulañia nú uhuañi zeca beella lu eluti stucu bese, nu unibiyaê beella cuna Jesucristo tucu mili lana. 5 Bese quieê neca bese rluti nú uhuañi bee benenguti, pero texcuaêa bee benenguti la huañi hasta nú yalu tucu mili lana zeêe. 6 ¡Nza nzeêcae equie cuendaê bee bene enu rluti huañi zeca lu eluti! Liêibeella lecaê xinaa beella ante Diose, nu la atiaê beella bese rrucu sino que liêibeella aca beella uleêyaê Diose cuna Jesucristo nu nibiyaê beella cuna liêinu lu tucu mili lana. 7 Chenu uzaêla tucu mili lana, che laêa zeca bezeêlu ebila elu netsei, 8 para nú zequienui arquiê ye bee bene iliulabe. Zequienui arquiê Gog cuna Magog, para nú quieteêsaê beella bee beneê beella nu rriêibeella xuu. Nu chiquiê huaxi neca beella xi huaxi eyuxi ruêu inzatuê. 9 Nu nzeêta bee benequieê enza huaxi bee luhuare, nu yeteêsaêbeei abenchilaê elu nucuaêa bee beneê Diose, cuna abenchilaê eyeche nú chiquiê secanu. Pero desde liñibe xeêla Diose quii para nú chiquilixu ye bee benecuaê. 10 Nu bezeêlu enu uzequienu liêibeei uyuêu luquii elu nuê azufre, elu leêca netsela monstruo cuna profeta enu uzequienu bee bene, nu zeêe lecaê bichia nú chiuêu beei, nu chiquiê zeca beei castiya nú leca xunga laxu bichia si rulaê. 11 Che ulañia tucu xleta nú rnaa xi rnaa xletaê arre, llenee nu niquichi. Nu lu xleta zeêe nzucu tucu enu nzucu. Nu ante lu nzeêe ulaxulí iliulabe nu liñibe. 12 Che ulañia nú ante lu xleta elu nzucu Diose, zeêe nucuaêa bee bene enu uhuañi lu eluti bee bene uxu cuna bee enu meêe. Nu uyaêla lubee libro nú nequie nombreê beella, nu leêca uyaêla lu stucu libro nú nequie nombreê bee bene enu huañi liñibe. Che ulualu Diose lucuendaê bee benenguti zeêe, lunú xi uriêi cada tucu beella nequie lu libro zeêe. 13 Inzatuê udeteê cuendae bee bene enu unguti lue, leêca esquie eluti udeteê cuendae ye bee bene enu unguti, uriña bee benequieê lu Diose para nú lualunue lu cuendaê cada tucu beei lunú xi uriêibeei. 14 Che eluti, nu luhuareê bee benenguti, rucuaa bee nucuaê uyuêu luquii, lu quii cuaê neca eluti rrucuê bee bene. 15 Nu luquii zeêe uyuêu bee bene enu la nzucu ichi nombreê lu libro nú rliquiê elunehuañiê bee bene.