Romanos 11

1 La nia luhua nú utsanaê arquiêla Diose bee bene Israel, xne lacane scua. Liêihua nediyaêhua nú leêca bene Israel necaa, nu leêca leta bee familiaê Abraham nzelaa equie nú nzelaa lubee familiaê Benjamin. 2 Asta huaêtu ucañi Diose bee bene Israel nú aca beella bee beneênu, enzeêe la tsanaê arquiênu beella. A nchiucuê arquiêhua lu ichiê Stichiaê Diose elu rni: Chenu uxanabitsi profeta Elías lu Diose equie cuendaê bee bene Israel chenu unilla: 3 “Diose Pa liñibe, udiñila beella ye bee profetaêlu, nu unitilula beella bee ecuêcuêlu. Nu stucutsia liêá uyaênaa nu leêca niarquiê beella nú úti beella liêá." 4 Pero ¿xi ucuaqui Diose lulla che? Liêinu ucuaquinu: “Uhuachulá achi mili bee bene para liêá enu lascaêli zuculliqui lu diose enu lee Baal." 5 Leêca scua nucuaêa chiucu chuna bee bene Israel enu ruaêa arquiê Diose, nu ucañinu beella para nú aca beella bee beneênu. 6 Nu equie nú uhuaêa arquiê Diose beella, enzeêe ucañinu beella, nu la necane equie nú xi rriêibeella, xne tunu ucañi Diose beella equie nú xi rriêibeella che la acaêe equie cuendaê nú ruêa arquiê Diose beella. 7 Scua ungae. Bee bene Israel enu ucañi Diose, ullelaêlaêbeella inziuê Diose equie nú nzeli arquiêbeella liêinu. Pero beelá bee bene Israel lascaê llelaê beella inziuê Diose, xne rlaêna beella inziuê Diose tucu nú niarquiêtsiabeella, nu la cuaêna beella Stichiaê Diose tucu nú niarquiênu, che uriêinu nú unga nziti arquiêbeella. 8 Tucu nú nequie lu ichiê Stichiaê Diose elu rni: “Uriêi Diose nú unga necabe elliebacuê beella, mase rlañiê beella pero neca xi neca nú la lañiêbeella, nu mase rieneê beella pero neca xi neca nú la yeneê beella”, nu scua rriêibeella hasta nee. 9 Leêca uni David: Equie elubacu nzeêcaê beei nu eluxeneêbeei nucuaê sequienu arquiêbeei nú nehuañi nzeêca beei, nu zequienune arquiêbeei para nú zeca beei castiya nú rialabeei, 10 Nu cabe iêcuêlubeei xi necabe iêcuêlu tucu bene enu la yeêe lu, nu zecabeei xi seca tucu bene enu leca xunga tsuxe nú nehuana seca. 11 La nia luhua nú lunú lá zela bee bene Israel ariêi tucu nú niarquiê Diose nú unitilulabeella lu Diose, xne lacane scua. Lunú rnia luhua necane nú lá zucuê beella Stichiaê Diose, che scua uluêcu bee bene enu laca bee bene Israel nú xneca tsilaêabeella, para nú scua yea arquiê bee bene Israel nu che nuê modo tsilaêabeella. 12 Nee tunu lunú la zucuê bee bene Israel Stichiaê Diose, uzibiê nucuaê para nú yala beelá bee bene iliulabe eluxeneê Diose, nu lunú uluachu beella lunú niarquiê Diose riêilubeella uzibiê nucuaê para nú tsilaêa bee bene enu laca bee bene Israel. ¡Chiquiê masescaêlá ñia riêi Diose nú cha nzeêca lu cuendaê bee bene chenu zela bee bene Israel riêi tucu nú niarquiê Diose nú riêibeella! 13 Nia luhua bee bene enu laca bee bene Israel, scua tucu nú uxeêla Diose liêá luhua para nú ixiuleêa stichiaênu luhua, chiquiê rlaênaa nú riêá tucu nú riala nú riêá, 14 para nú scua biase chuêu bee bene lachia Israel enu chiquiê niarquiê riêi tucu nú rriêihua, nu che tsilaêabeella. 15 Neli nú equie nu né zucuê bee bene Israel Stichiaê Diose, scua uyuêu modo nú xneca atsilaêa beelá bee bene. Pero, ¿chiquiê masescaêlá ñia neca chenu chili arquiê bee bene Israel Stichiaê Diose? neca nucuaê xi neca chenu rehuañi zeca tucu bene enu unguti. 16 Nu scua tucu nú uriêi Diose nú nza nzeêcae lu cuendaê bee bene Israel enu udetela, nucuaê neca tucu seña nú leêca scua cha nzeêcae lu cuendaê beelá bee bene Israel, leêca scua tunu rriêi Diose nú nza nzeêca lu cuendaê luu tucu aca, nu chenu nza nzeêcala luu aca cuaê, diquineca aca cuaê nza nzeêca lu cuendaê che. 17 Bee bene Israel neca beella xi neca tucu aca olivo, pero nuê beella enu neca xi neca ellutsa lue nú urecuê, nu liêilu enu laca bene Israel necalu xi neca tucu ellutsaê aca olivo ixi nú uyelaê luhuareê ellutsaa nú urecuê lu aca olivo zeêe, chequie scua rluêculu elunehuañi equie cuendaê luu aca zeêe. 18 Enzeêe la tsiêlu nú maselálu lu ellutsaê aca olivo nú neca xi neca bee bene Israel. Pero tunu scua rriêilu elliebacuê, ulluêcuê arquiê nú laca liêilu enu rdeteê elunehuañiê luu aca zeêe sino que luu aca zeêe rliquiê elunehuañiêlu. 19 Tal vez nilu: “Neliêlu nucuaê, pero bee ellutsaa lu aca olivo cuaê urecuêe para nú yelaêa luhuareêe nu acatucunecatsea cuna aca olivo cuaê." 20 Neliêlu nucuaê, pero bee ellutsaê aca olivo nú rniru nú neca bee bene Israel urecuê bee xne la chili arquii nu liêilu uyuêulu luhuareêe equie nú nzeli arquiêlu Jesucristo, enzeêe la aca nelliñalu sino mejora nú biêya liêilu. 21 Xne tunu bee bene Israel enu neca xineca ellutsa lu aca olivo zeêe né huaêa arquiê Diose leêca scua nuê beyaê nú la huaêa arquiê Diose liêilu. 22 Uriêi beyaê nú nzeêca Diose, pero leêca rriêinu elu usticia tucu nú necane. Nu uriêilanu elu usticia lubee bene enu la zucuê stichiaênu, nu uriêinu nú neca nzeêca lulu. Pero riala nú huañilu tucu nú niarquiê Diose nú huañiaêahua xne canu leêca riêi Diose elu usticiaênu lulu. 23 Nu tunu bee bene Israel benchilaê arquiêbeella lu Diose nu chili arquiêbeella Jesucristo che liêinu luêcu cuendanu liêibeella cuna beelá bee bene enu nzeli arquiê Jesucristo. Xne liêinu rluêcunu poder para nú riêinu nú acatucunecatse beella cuna beelá bee bene Israel. 24 Xne tunu liêilu enu laca bene Israel necalu xi neca tucu ellutsaa aca olivo ixi nu unga tucunecatselu cuna aca olivo stila nú neca bee bene Israel, ¡xaquie nú la acane scua lubee bene Israel enu lá zucuê Stichiaê Diose nú la aca tucunecatse beella stucu bese cuna beelá bee bene Israel, tunu zucuê beella Stichiaê Diose! 25 Bee saêa enu nzeli arquiaêahua Jesucristo nuê tucu nú la riêihua beya nu niarquia nú riêihua beyaêe para nú la aca nelliñahua: bee bene Israel enu reca nziti la niarquiê zucuê Stichiaê Diose, scua recae hasta bichia nú laxu chili arquiê yebee bene enu laca bee bene Israel Stichiaê Diose, bee enu rquiêña nú chili arquiê. 26 Chenu ungalane scua che ye bee bene Israel riêi caso Stichiaê Diose. Nu scua tsilaêa beella tucu nú nequie lu ichiê Stichiaê Diose elu rni: Eyeche Sión chiuêu tucu bene enu riêi elietsa lubee bene enu nzeêta lu familiaê tuxie Jacob, para nú tsanaê arquiêbeella nú necha neca rriêibeella. 27 Che yalu stichiaêa tucu nú unila nú riaêá perdona stula beella. 28 Pero nee lunú reca nziti bee bene Israel nu lá chili arquiêbeella bedichiaê nzeêcaê Jesucristo, che scua nuê modo chili arquiêhua liêihua enu laca bee bene Israel. Nu añinzuca nú scua necane pero secascaê Diose liêibeella tucu nú ucuaqui uênanu lubee beneêbeella enu udetela. 29 Xne la cheêe Diose elliebacuênu, nu la yucunu lunú lia udeteênu lubee bene, nu leêca la tsanaê arquiênu bee bene enu ucañilanu para liêinu. 30 Huaêtu liêihua ne chenalahua Stichiaê Diose. Pero nee equie cuendaê bee bene Israel enu la zucuê Stichiaê Diose nee ulubeênu luhua nú ruaêa arquiênu liêihua. 31 Nu tunu nee bee bene Israel la zucuê Stichiaê Diose, recae scua para nú huaêa arquiê Diose liêihua, pero leêca riña bichia nú huaêa arquiênu liêibeella. 32 Uzela Diose nú sia bee bene Israel nu bee bene enu laca bene Israel la zucuê beella stichiaênu para nú huaêa arquiênu beella. 33 ¡Chiquiê llene neca eluxeneê Diose cuna lunú recanu nu cuna lunú rriêinu beyaê! Lecati riêibeyaê xa neca elliebacuê Diose urre lunú rriêinu, 34 tucu nú nequie lu ichiê Stichiaê Diose elu rni: “¿Ti itá riêi beyaê nú xneca neca elliebacuê Paêahua Diose? ¿Ti máse reca para nú nii lu Diose nú xneca riêinu?" 35 Urre, “¿ti udeteê xi udeteê lu Diose para nú nzuquie nzeêe nú ixiunu lu nzeêe?" 36 Yebee nú nuê neca steneênu nu liêinu urecheênue nu yeene necane para liêinu. Enzeêe riala nú luêcu bee bene ulaêna lunu diqui tiembu. Amén.