Romanos 9

1 Como beneê Jesucristo nú necaa, rnia nú neli neca luhua la nia eluquichiaê luhua. Nu liêá nediyaa nú Espíritu Santo nediyaê nú neli neca nú rniá luhua, 2 nu yeyeêe chiquiê nehuana nzu arquia hasta nú rcuu arquia. 3 Nu hasta niarquia nú mase nú yalalá castiyaê Diose mase nú huachu Jesucristo liêá tucu chu, pero alaê nú tunu scua nuê modo riêi nucuaê elietsa lubee bene lachia Israel para nú la zeca beei castiya. 4 Nucuaê siêá lubee bene lachia Israel, nu liêibeei neca enu ucañi Diose nú aca bee beneênu, nu rulu siquiênu ubeêtanu lubeella, nu uninu lubeella nú xneca modo luêcubeella tucu inziu nú riña beella lunu, nu udeteênu leynu yabeella, nu uninu lubeella nú xneca luêcubeella ulaêna lunu, nu uninu nú xi deteênu lubeella. 5 Nu la necane lucuendaêtsia bee nucuaê, sino que leêca lubee familiaêahua enu udetela enu uzibiê lu Diose nzeêtabeella, nu leêca lu familia cuaê nzeêta Jesucristo chenu uriñanu lu iliulabe liêinu enu neca Diose enu riala nú luêcu bee bene ulaêna lu diqui tiembu, equie nú rluêcunu elurnibiyaê lu yebee nú nuê. Amén. 6 La nia luhua nú la tsaluaê Diose stichiaênu lubee bene Israel, sino que lunú rnia nú la yebee bene Israel neca bee beneê Diose. 7 La necane equie nú nzeêtabeella lubee familiaê Abraham nú yebeella neca beella beneê Abraham, xne uni Diose lu Abraham: “Hasta lu enduêlu Isaac quixie bee lliêñilu." 8 Scua rriaêahua beyaê nú la neca nú neca bene bene Israel, nú necala bene beneê Diose, sino que bee enu neca beneê Diose neca bee enu nebacuê nzeêta leta bee familiaê Abraham xne nzeli arquiêbeella Stichiaê Diose xi uyalí arquiê Abraham. 9 Xne uyalí arquiêlla nú uni Diose lulla, chenu uninu lulla: “Steliana leêca mismo tiembuquieê nzelaa nu che rluêcula Sara tucu enduê." 10 Nu lacane nucuaêtsia sino que chenu uruêcu Isaac enduê Sara, che uchialla Rebeca. Nu ante nú ala bee cuachi enu ullana Rebeca. 11 Chenu lascaê chulu beenu niênú neca nzeêca nú niê nú necha neca, para nú acachee nú nediyaêlaê Diose xa rcañinu bene, nu la necane lunú xa rriêi bene sino que liêinu nediyaêlaênu ti rcañinu, nu ante nú ala bee cuachi cuaê, 12 Diose uni lu Rebeca: “Lurucu bee cuachicuaê enu ala nú rrucu, neca enu nibiyaê lu enu rlutilá ala." 13 Tucu nú nequie lu ichiê Stichiaê Diose elu rni: “Ulleêcaa Jacob pero ulea lu Esaú." 14 Nu nee, ¿xieê nuê modo nú niaêahua nú la riêi Diose tucu nú necane ché la? ¡Pero lacane esquie! 15 Xne uni Diose lu Moisés: “Seêcaa bee bene enu niarquia nú zeêcaa nu ruaêa arquia bee bene enu niarquia nú huaêa arquia." 16 Enzeêe leca modo nú huaêa arquiê Diose bee bene lunú niarquiêtsialla urre equie nú xi rriêilla sino que necatsia nucuaê cuendaê Diose nú ti niarquiênu huaêa arquiênu. 17 Lu ichiê Stichiaê Diose rni nú uni Diose lu arre Egipto: “Liêá uriêá nú ungalu arre para nú lañiê bee bene lunú recaa nu lu cuendaê liêilu riêchialetse bee bedichiaê nú ti necaa diqui lu iliulabe." 18 Enzeêe nia luhua nú nediyaêlaê Diose nú ti niarquiênu huaêa arquiênu, nu leêca rriêi nzitinu enu niarquiênu nú aca nziti. 19 Pero tala bese nihua lua: “Tunu scua necane, ¿xinu rle Diose nú xneca necaêahua nu leca modo niaêahua lu Diose nú xi riêinu?" 20 Pero, ¿ti necalu para nú niilu scua lu cuendaê Diose? Xieê nuê modo ni etsu lu bene enu urecheê etsu: “¿Xinu urecheêlu liêá scua?" 21 ¿Xieêlanu enu rrecheê bee etsu, liêilla rriêinulla yuubiêchi xitse nú niarquiêlla la? Liêilla nediyaêlla xi recheêlla cuna yuubiêchi zeêe, tunu recheêlla tucu etsu nú rquiêña yeyeêe urre tucu etsu nú rquiêñiatsia lu eliñi. 22 Neequie leêca scua nediyaêlaê Diose ti riala castiya, nu hasta nú nuê beyaê nú chu deteênu castiya bee bene para nú scua acachee nú rluêcunu poder pero liêinu uluêcu arquiênu nu uriquiênu bee bene enu lá zucuê stichiaênu bee enu riala nú nitilu. 23 Nu uriquiênu liêibeei para nú acachee nú liêinu rluêcu cuendanu nú xa riêinu nu rluêcunu nú rnibiyaênu, nu uhuaêa arquiênu bee enu nediyaêlaênu nú hasta huaêtu riala nú chuêu liñibe. 24 Nu liaêahua neca bee benecuaê, bee enu ubixia Diose sia leta bee bene Israel nu sia leta bee bene enu laca bee bene Israel. 25 Tucu nú nequie lu ichiê Stichiaê Diose nú uquieêe profeta Oseas, elu rni: Bee enu laca benea, nia lubeei benea, nu bee bene enu lecati zeca, liêá zecaa beei. 26 Elu uni Diose lubee bene: “Liêihua lacahua bee benea”, zeêe liêibeei acabeei lliêñi Diose enu nehuañi. 27 Leêca uni profeta Isaías equie cuendaê bee bene Israel: “Mase nú chiquiê huaxi bee bene Israel tucu nú huaxi eyuxi ruêu inzatuê, pero laca huaxi bee bene enu tsilaêa. 28 Xne lacaxea nú tsalu Diose stichiaênu lu iliulabequieê tucu nú unilanu." 29 Nu hasta huaêtu leêca uni profeta Isaías: Tunu Paêahua Diose enu rluêcu ye nú rnibiyaê azela nú alaxu yebee beneêahua enu udetela, hasta huaêtula ulaxu bee beneêahua che, tucu nú ulaxu bee bene Sodoma cuna Gomorra. 30 Neequie, ¿xaniaêahua nee? Bee bene enu laca bee bene Israel niê lá achenu arquiêbeella xa tsilaêa beella pero nee utsilaêala beella lunú nzeli arquiêbeella Jesucristo. 31 Nu bee bene Israel mase nú chiquiê ulaêna beella modo nú xneca huañibeella tucu nú rnibiyaê ley para nú tsilaêa beella pero né riêibeella ana. 32 ¿Xiquie nú né riêibeella ana nú tsilaêa beella? Xne mase ulaêna beella nú huañi beella tucu nú rnibiyaê ley, luhuare nú chili arquiêbeella Diose tucu nú riala nú chili arquiêbeella liêinu para nú tsilaêa beella. Nu unga Jesucristo lubeella: “Xi neca tucu quiee nú xica cuchiuê bene." 33 Tucu nú nequie lu ichiê Stichiaê Diose elu rni: Liêá zucua tucu quiee eyeche Sión, quiee nú llica cuchiuê bene, nu zanaê bene. Nu enu chili arquiê liêinu lecaê xunga tuê nzeêe.