1 Corintios 9

1 Walab mbecy ricy dey mandaar ya̱. Ya̱ naca̱ tub aposht, tub yu nu bzuu nez Ãgyoozh. Nunu ya̱ bzaac urlo̱ la̱ Shuaan den Jesuuz. Nunu ¿a walab de ru nac der mbecy nim nu nac riiñ nu ricya̱ nim? 2 Mas yuê mbecy nu wagyicy yu ya̱ par aposht, tees par de ru segur la naca̱ aposht, gun par nu nac ya̱, byac der mbecy ni Shuaan den. Ndeê nu rabee nu ya̱ naca̱ aposht. 3 Ornu de mbecy rnii zi dey ne̱, orzeê ni mod rca̱ uba̱: 4 ¿Walab gaal walab seêñ nu cuic der coz nu da̱w gal nu de coz nu do̱ê? 5 ¿Walab gaal walab seêñ nu gyicya̱ gal nu ricy deê zir de aposht, gal nu Bed, nu de bicy Shuaan den? Gun de yu zeê zu mñaa dey, nunu rded nu dey mñaay lat nu ricy dey riiñ ni Ãgyoozh. 6 ¿Uti rsaê lagy der nu ya̱ nu Bernabee a̱ê yad ñi nu checa̱ de̱ nu gyicy de̱ riiñ ne̱ par nu gad nu da̱w de̱ lat nu shaal de̱ de riidz ni Ãgyoozh? 7 Gun de soldad yad ñi ni dey nu gyash gyiê de gasht nu ricy yu. Nunu de yu nu rnuuz lyucy urbyay yad ñi ni dey nu gow yu urbyay niñ. Nunu de yu nu rña shily yadaêñ ni dey nu shi̱i̱y ma goêy lech ni ma. 8 Cueê nii too der nu ndeê coz nu ya̱ ziêl rne̱e̱, gun niê ziêl rniiñ lo leey nu pcaa Ãgyoozh nu bzeeñ Moisees. 9 Gun lo leey nu bzeeñ Moisees rniiñ: “Cueê zuur gyish ruê toor ornu rza ma lo trig nu cyich ma ñii”, rniiñ. Rabee nu Ãgyoozh wacsu bich mi nu nac de tor ziêl, 10 sinu nii tub riidz nu rlyuuñ ni den nu lac mod gyicy na nu losaên. Gun leey ii pcañ par nu gyicy ñi nu cyiiñ gusht den. Gun de mbecy nu rlaê yu, nu de mbecy nu rgyich trig, rup laa dey rgyish lo dey nu gad ñuu cosech niy. 11 Orzeê de̱ ya̱ mnuuz de̱ ñuu coz ni Ãgyoozh lat der. ¿A waruu nap ñi rzii der benu cyish der mas ñuu i̱ de̱? 12 Benu reñaê mbecy rgyish loy nu cyish der iy, zeê yegar de̱ ya̱ ricy zir ñi presis nu cyish der i̱ de̱. De̱ ya̱ mas ndeê coz seêñ nu cyish der i̱ de̱, tees wanne̱e̱ de̱ lo der nu ñgyish der i̱. Sinu gugye̱e̱ de̱ zañ lo coz par nu cueê ñgyicy zeed de̱ der lat nu pshaal de̱ riidz ni Crisht. 13 De ru rad lagy der nu de mbecy nu ricy riiñ nañ yuê nu rca de mbecy Israeel Ãgyoozh, nañ yuê zeê druu de coz nu row dey. De mbecy nu ricy riiñ lo mez yon ni Ãgyoozh lo liê ni yuê zeê nu rshu dey reñ bañcyug, de mbecy zeê yad ñi ni dey nu gow yu de beel bañcyug nu rbic dey gun lugaar zeê. 14 Niê ziêl mod, bicy pee Ãgyoozh par de mbecy nu rshaal de riidz nu sac nim. Nu nac de riiñ zeê nim, cuic mbecy nu gow dey. 15 Mas ndeê coz nu seêñ, tees ya̱ rila wanne̱e̱ lo der nu ni gyicy nu der ya̱. Nunu mas na walab nu zeeda̱ gyicy ii lo der par nu ca̱a̱ der nu ni gyicy nur ya̱. ¡Nap zir nu gata̱ gyel ran, gazeê nu grusu tub mbecy nu coy gusht nu ricy cupa̱! 16 Gun par ya̱, ornu rshaala̱ riidz nu sac ni Crisht, ndeê walab coz nu gyicy le̱ê, gun ndeê coz nu rlagy ñi par nu gyicy pa̱a̱ nu Ãgyoozh. Gun ¡dzi ga cua̱a̱ benu washaala̱ riidz nu sac nim gal nu rlagy ñi! 17 Benu dub gal rii la lagya̱ nu gyicya̱ ñii, orzeê gyad i̱. Tees como ndeê walab coz nu rnii to̱o̱ ya̱ ziêl, sinu Ãgyoozh bzeeñ mi riiñ zeê ya̱a̱, orzeê ndeê nu ya̱ wagrish lo̱ nu gyad i̱. 18 Orzeê ¿la ñuu coz gad ne̱ nu nac de riiñ zeê? Coz nu gad ne̱, ndeê nu shaala̱ riidz nu sac ni Crisht leew la. Mas yad ñi nu cuic mbecy nu da̱w nu nac nu rshaala̱ de riidz nu sac nim, tees ya̱ wadiña̱ coz nu yad ñi nu gad ne̱. 19 Gun ni tub la mbecy wac gyicy dey mandaar ya̱, tees ricya̱ nu naca̱ tub mbecy nu ricy de riiñ nu rlagy dela mbecy, gun dzi ga cuugya̱ lardoo zigy zir mbecy nu gyicy cup yu consuel lo Crisht. 20 Lat nu rdeda̱ lat de mbecy Israeel, orzeê ricya̱ mod nu ricy de mbecy Israeel, gun orzeê gad mod nu guugy lardoo dey. Lat nu rdeda̱ lat de mbecy nu riib ic leey nu bzeeñ Moisees, niê ziêl ricya̱ uba̱ par mbecy nu riib ic leey zeê, mas walab leey zeê riib ic ñi ya̱, gun dzi ga gyicya̱ gan guugy lardoo dey. 21 De mbecy nu a̱ê riib ic leey nu bzeeñ Moisees, niê ziêl na yaca̱ gal nu na de mbecy zeê, gun dzi ga guugy lardoo dey nu gyac yu mbecy ni Crisht. Ni ricya̱ mas segur la ricy yaca̱ nu de coz nu rlagy Ãgyoozh, gun leey ni Crisht bi riib ic ñi ya̱. 22 Lat nu rdeda̱ lat de mbecy nu ta ricy, orzeê niê ziêl yaca̱ê gal nu na mbecy nu ta ricy, gun dzi ga gyicya̱ gan nu cuugya̱ lardoo dey. Gal nu na dela de mbecy zeê, niê ziêl na yaca̱, ben a wad mod nu cuugya̱ lardoo la be dey, gun orzeê gruu mbañ dey. 23 Ricya̱ dela coz zeê par nu nac riidz nu sac ni Crisht, gun orzeê gyicy Ãgyoozh coz nap num ya̱ nu nac de riidz zeê. 24 De ru bi neñ der ornu tub nac mbecy rash dey carer, dela dey rboo loy. Tees tub zi lay drusuy nu ricy yu gan. Niê ziêl mod bicy der nu de coz ni Crisht, gun orzeê gyicy der gan. 25 Dela de mbecy nu rgyit, rzu lily dey par nu cyit yu. Ricy paa dey nu dela mod nu rlagy ñi ben a wayicy dey gan iy. I dey zeê, ndeê tub rued nu ryaa nu lyag ni tub lo gyee lagyis. Ndeê tub coz nu wagyee les. Tees de ub na gyicy na coz ni Crisht par nu gyicy na gan tub in nu rila waded ni. 26 Walab nu wagad lagya̱ ca par rusha̱ ornu drusha̱ carer, sinu drusha̱ carer par zeê nu gyad i̱. Ya̱ na gal na tub mbecy nu rgyit nu zig. Gun ornu zeeda̱ zig walab lo bi la zeeda̱ ñii, sinu zeeda̱ñ chañ tub mod par nu gyicya̱ gan gyad i̱. 27 Rcuugya̱ cuerp ne̱, nunu rca̱a̱ ñii por fers la nu gyicy ñi coz nu rlagya̱. Gun nis nit lo̱ i̱ despuees ornu bi blyu̱u̱ ni reñaê mbecy.