1 San Pedro 1

1 Ya̱ Bed, tub aposht ni Jesucrisht, zeeda̱ gyicy ii lo de ru mbecy Israeel nu bruu ledz nu za cyiiñ reñaê gyedz. Rcyiiñ der lo de yu ni Ponto, gal nu lo yu ni Galacia, gal nu lo de yu ni Capadocia, gal nu lo de yu ni Asia, gal nu lo de yu ni Bitinia. Dela lugaar zeê yuê der. 2 De ru nac der mbecy nu pcui Ãgyoozh gulas, gun ndeê coz nu rlagy ub mi. Espiriit Yon nim bzu chum der par nu gzuub gyidag der ni Jesucrisht, nunu bicy mi nu byecy cyi der nu nac reñ Jesucrisht. Ãgyoozh gyicy mi faboor nu ded ruê gaê la nap gyicy num de ru, nunu gyicy mi nu cheti ri añ ni der. 3 Gyabic den gyel mbecy ni Ãgyoozh Uz Shuaan den Jesucrisht, gun par nu nac nu tonaê la rashni lagy mi de ub na, ndeê nu bicy mi nu byac den mbecy cub nu nac nu byabañ Jesucrisht, nunu ndeê gyicy ñi nu rishli gad nu grish lo den. 4 Ndeê nu grish lo den nu cuic mi gyel nap nu bduê choow mi gyibaa par de ub na, de coz nu wac nit lo, ni watop ñi, ni waziñ. 5 Ãgyoozh zaab ic mi der nu nac nu rac ricy mi coz ily nu nac nu ricy cup der consuel lom. Ni gyicy mi, gun orzeê gad nu gruu mbañ der gal nu psaê lagy mi. Nunu laab Ãgyoozh gyicy mi nu yet lag der cuen lac mod co mbañ mi der ornu bi yad nu gyaê lo tiem. 6 Par nu nac ndeê, orzeê tonaê la gyet lagy der. Nomaas tub tiem zi galagy ñi nu gyicy shni der nu nac nu gzac der zañ lo coz deet. 7 Consuel nu ricy cup der lo Crisht, ndeê nañ gal nu na or. Na or zeê chañ lo gyi, mas nit lo lañ, gun orzeê gabe ben a rishli nac ñii or nap. Niê ziêl ornu gzac deet der, orzeê gabe ben a rishli ricy cup der consuel lo Crisht. Nunu consuel zeê sac zir ñi gazeê or. Benu gabee ricy cup der consuel lo Crisht ornu ded ni nu gzac deet der, orzeê Ãgyoozh gyabic mi gyel mbecy ni der, nunu gyicy mi nu gyac der mbecy nu lily na, nunu griib zily mi de ru. Ni gyicy der ornu gruu zac Jesucrisht tuubaê tir. 8 De ru rca der Jesucrisht mas nigul zac der mi. Nunu ricy cup der consuel lom mas wac zac der mi na. Orzeê gucyit lagy der tub mod nu tonaê la coz ily. Tub mod nu druu gal gyibaa. Ni wagacaê cuic der raso̱o̱ de riidz ni de coz nu rzac ru. 9 Gun par nu nac nu guud nu bruu mbañ der, orzeê ndeê nu ricy cup der consuel lom. 10 Orzeê gulas de yu nu mnii por cuen ni Ãgyoozh nap tonaê la psyaê dey nu byub yu de zeê nu rniiñ ni de riidz nu gruu mbañ de mbecy. Nunu bzat dey de coz nu gyicy Ãgyoozh faboor num de ru nu cuic mi ni der. 11 Orzeê Espiriit ni Crisht bicy mi nu gud lagy de yu zeê de coz nu gzac zim, gal nu de gyel lily nim nu gruu zac despuees. Ndeê tonaê la gulas gud lagy dey. Nunu bicy pee dey nu ñgyad lagy yu cyu mbecy ndeê. Nunu bicy pee dey nu ñgyad lagy yu la tiem gac de coz nu mnii Espiriit ni Crisht, biñ nu bicy cup dey nañ lardooy tiem zeê. 12 Tees Ãgyoozh bicy mi nu guud lagy dey riidz nu mniiy. Ndeê walab par de ub yu, sinu ndeê par de ub na. De riidz zeê, ndeê riidz nu güeñ der ornu mnii de yu nu rshaal de riidz nu sac ni Crisht nu nac Espiriit Yon ni Ãgyoozh, biñ nu bruu gal gyibaa. ¡Nunu mas gashtal de anc ngulagy dey nu ñgyet lag yu cuen lac yaruu de riidz zeê! 13 Ndeê nu bzu der altant, nunu byub ic der ub ru tub mod nu nap. Brish lo nap la der lo de coz nap nu cuic Ãgyoozh ni der ornu gruu zac Jesucrisht tuubaê tir. 14 Bicy der gal nu rlagy ñi como nac der iêñ Ãgyoozh. Nunu bzuub gyidag der nim. Nunu cueê gyicy der de coz a̱ê nap nu druu nañ lardoor, gal nu bicy der anzir nu chuê lo der mi. 15 Lugaar nu gyicy der de coz a̱ê nap zeê, orzeê bicy der mod nu nap par lo Ãgyoozh. Gun Ãgyoozh, biñ nu bzu de ru nu gac nim, mi zeê nac mi biñ yon. 16 Ãgyoozh nam lat de riidz nim: “Guc der mbecy nu wagyicy cyi, gun ya̱ wagyicya̱ cyi”, nam. 17 Ãgyoozh gri beem ni tub ga la de mbecy dub gal nu na coz nu ricy dey, nunu walab nu reñ ga la mod gyicy mi num tub ga mbecy. Como de ru “Uza̱”, rnii der lo Ãgyoozh, ndeê nu rlagy ñi nu ca lagy der lom dub laa tiem lat nu yuê der gyishlombecy ii. 18 Ãgyoozh bi bloo nap mi de ru lat de mod wancyiiñ nu pcyiiñ der gulas, de mod nu bzeeñ de gyitoo bel ni der. Na de ru nap rad lagy der la be la yuê lo mod nu bloo mbañ mi der. Walab nu coz nu ded ni briish mi. Ni walab nu briish mi nu or. Ni walab nu briish mi nu plat. 19 Sinu briish mi nu reñ Crisht nu dzi sac. Mi zeê guc mi gun lo Ãgyoozh. Guc mi gal nu na tub shily nu rila sac falt ni. 20 Crisht nil bi ca lo cuen nim nu ni zac mi nese anzir nu saê lagy Ãgyoozh gyishlombecy. Tees na nu bi yad lazh tiem bruu zac mi par nu locyuub mi de ru. 21 Zeê na nu nac Crisht, de ru ricy cup der consuel lo Ãgyoozh, biñ nu bicy nu byabañ mi. Nunu briic mi gyel lily nim ni Iêñ mi. Ndeê nu de ru ricy cup der consuel lo Ãgyoozh, nunu rgyish lo der lom. 22 Zeê na ornu de ru bzuub gyidag der de riidz nu rishli ni Crisht, orzeê byecy dela cyi der. Gun orzeê rishli gaal ca tub ca tub ziêl der losaêr nu dutuub la lardoor, gal nu dela fers ni der. 23 Tees de ru na der gal nu na mbecy nu bi gul tuubaê tir. Na walabaê nu gul der nu nac mbecy nu yuê gyishlombecy ii, de yu nu ca lo cuen nu gat, sinu gul der nu nac de riidz ni Ãgyoozh. Riidz zeê nim gyicy ñi nu cui mbañ mbecy, nunu gzuñ par dub laa tiem. 24 Gun lat de riidz ni Ãgyoozh rniim: Dela mbecy na dey gal nu na gyish. Zeê gyel lily ni dey, ndeê nañ gal nu na gyee ni gyish. Gyish zeê, ndeê chawach ñi. Zeê gyee, ndeê glag ñi. 25 Tees de riidz ni Shuaan den, ndeê gzuñ par tub la. Ni rnii de riidz ni Ãgyoozh. De riidz nu rzat ñi zeê, ndeê riidz nu sac ni Crisht nu rshaal de̱ lo de ru.