1 San Pedro 2

1 Ndeê nu blaa yaa der de lo la coz a̱ê nap nu ricy der. Rila cueê guu der. Nunu cueê gac der mbecy rzuu lo. Nunu cueê gasaap lagy der. Nunu rila cueê gzat zi der losaêr. 2 Guc der gal nu na mdoo nu sa gul. Bicy der nu cuigy ru lech du ub nu cyiiñ par espiriit ni der, gun orzeê nu nac ndeê gal shcab ni der par nu gruu mbañ ru. 3 Gun rishli gaal de ru bi gud lagy nap la der nu Ãgyoozh Shuaan den dzi nap mi. 4 Ndeê nu bechaê der lo Shuaan den Jesuuz, gun mi zeê nam gal nu na tub gyitaê nu mbañ. Orzeê de mbecy guzii dey nu wacyiiñ gyitaê zeê. Orzeê mneê dey ñii. Tees par Ãgyoozh, ndeê tub gyitaê nu bducui. Nunu nac ñii gyitaê nu dzi sac. 5 Orzeê ni mod bicy der nu gac ru gal nu na gyitaê zeê. Orzeê Espiriit Yon nim gash mi de ru par nu shup mi yuê wedz nim. Orzeê nañ yuê wedz zeê gac der uz par nu gyicy der riiñ ni ub ziêl mi. Orzeê nu nac Jesucrisht cuic der gun lo Ãgyoozh, de gun nu rnii Espiriit Yon nim nu cuic der. Ndeê gun nu gyedzuê lagy mi. 6 Ndeê nu niê ziêl rniiñ lat de riidz ni Ãgyoozh: Ya̱ grisha̱ tub gyitaê Sión gyedz ni Ãgyoozh. Ndeê nac ñii tub gyitaê nu ricy zir ñi presis. Ndeê tub gyitaê nu ya̱ pcui̱ nu gac ñii gyitaê nu dzi sac. Cyu ziêl mbecy nu gyicy cup consuel lo biñ nu nac gyitaê zeê, orzeê de mbecy zeê waruu toê loy, na Ãgyoozh lat de riidz nim. 7 Par de ru mbecy nu ricy cup consuel lo biñ nu nac gyitaê zeê, orzeê mi zeê tonaê la ricy ñi presis par de ru, tees par de mbecy nu wagyicy cup consuel lom, orzeê gyuê niñ gal nu rniiñ lat de riidz nim. Orzeê rniiñ: Gyitaê nu mneê biryu, ndeê byac ñi gyitaê nu ricy zir ñi presis, rniiñ. 8 Zeê tuubaê lugaar rniiñ: Ndeê tub gyitaê nu gyicy ñi nu glagy gyiê mbecy. Nunu gyicy ñi nu gyes saa dey, rniiñ lat de riidz ni Ãgyoozh. De mbecy zeê glagy gyiê dey nu nac nu wacsuub gyidag yu ni riidz nim. Ndeê tub coz nu bi ca lo cuen nu ni gzac dey. 9 Zeê de ru nac der mbecy nu pcui Ãgyoozh nu gac famil nim. Nac der uz nu zu riiñ lo Ãgyoozh, biñ nu nac rey ni den. Nac der tub nac mbecy nu nac ni Ãgyoozh. Nac der de mbecy zeê, gun orzeê gzat der de coz ily nu ricy mi. Mi zeê biñ nu pcui de ru par nu gruu der zeê nu cow, gun orzeê chuê der zeê nu yuê yaa nu tonaê la cyit zu. 10 De ru a̱ê nac der mbecy ni Ãgyoozh gulas. Zeê na nac der mbecy nim. Gulas wangashni lagy Ãgyoozh de ru. Tees na rashni lagy mi der. 11 Ya̱ rnishbaa lo der bicy na nu dzi rca̱, bicy der gal nu ricy mbecy nu walab mbecy guledz. Cueê shet ic der nu gyicy ru de coz a̱ê nap nu druu nañ shcab nir, gun de coz zeê zañ contr ni espiriit nir. 12 Nap bicy der lat de mbecy nu a̱ê yuê lo Ãgyoozh, gun orzeê mas griib dey cyi fals too der nu nii dey nu nac der mbecy shiñ ricy, tees ornu gad lagy dey de coz nap nu ricy der. Orzeê gyabic dey gyel mbecy nim ornu cyid mi tuubaê tir. 13 Orzeê par nu nac Shuaan den Jesucrisht “O” mnii der ni dela mbecy nu nac fushtiz gyishlombecy ii. Gazaê yu nu riib ic de nasyoong, “O” mnii der nu zuub gyidag ru niy, gun yu zeê zuy riiñ ily par deê zir dey. 14 Niê ziêl “O” mnii der ni yu nu riib ic por cuen ni gubier, gun yu zeê bdugyiy riiñ par nu cuic yu cashtig ni de mbecy nu shiñ ricy, nunu par nu gyabic yu gyel mbecy ni de mbecy nu nap ricy. 15 Gun Ãgyoozh rlagy mi nu nap gyicy der, gun orzeê de mbecy nu wagad lagy, gal nu de mbecy ton, wad la ruê dey nu niiy nu chay contr ni der. 16 Bicy der gal mod nu ricy mbecy nu riib ic ub. Mas riib ic der ub ru, tees cueê cuic der lugaar ni ub ru nu gyicy ru coz a̱ê nap. Sinu bicy der tub mod nu nap zir par nu nac der mbecy nu ricy coz nu rlagy Ãgyoozh. 17 Bicy der mod nu rabee nu rca lagy der lo dela mbecy. Pca der de bicy ru nu nac Crisht. Nunu nap pca lagy der lo Ãgyoozh. Nunu pca lagy der lo yu nu riib ic de nasyoong. 18 De ru moz nu ricy riiñ ni mbecy, rlagy ñi nu “O” nii der ni patro̱o̱ nir nu rca lagy der loy. Cueê nu tub lo ziêl nu nap gyicy der nu de yu nu nap ricy, gal nu nu de yu nu gugy na, sinu niê ziêl gyicy der nu de mbecy a̱ê nap. 19 Gun ndeê tub coz nap ornu tub mbecy ragyeey nu rzac ziy ornu sac falt niy nu nac nu rad lagy yu nu ndeê coz nu rlagy Ãgyoozh. 20 Tees benu cuic dey cashtig ni der nu nac nu shiñ ricy ru, orzeê se la la cyiiñ ñi mas gagye der nu pase̱z. Zeê benu zac zi der nu nac de coz nap nu ricy ru, nunu benu gagyer looñ nu pase̱z, orzeê ndeê coz nap par lo Ãgyoozh. 21 Gun Ãgyoozh bzum de ru par nu gagye der lat de tiem nu gzac zir, gun Crisht bzac zim nu nac de ru. Nunu blyuum ni der lac mod gyicy ru, gun orzeê gyicy der gal nu bicy mi. 22 Crisht wangyicy mi ni tub la cyi. Ni wanguum ni tub la mbecy. 23 Ornu gugy zi mbecy mi, orzeê rila wanniim ni tub riidz. Ni wantush cyam riidz nu tañ za lo dey ornu pted zi dey mi, sinu bduêm ñii yaa Ãgyoozh, biñ nu ri bee mod nu seêñ. 24 Laab ub la Crisht, lat nu pcam lo cruuz nu cuerp la nim, orzeê za num dela cyi den, gun orzeê de ub na nan gal nu na mbecy gut par lo de cyi. Orzeê cyiiñ den gyishlombecy par nu gyicy na de coz nu seêñ. Crisht gud güiim, gun orzeê de ru gruu nap der. 25 Gun de ru gusa der gal nu gusa shily bduneê. Tees na bi bish cya der brir lo Crisht, gun orzeê mi zeê ñam de ru gal nu rña tub mbecy shily niy, nunu ca laa lom lo den.