2 Corintios 4

1 Ndeê nu de̱ ya̱ wanshiêñ de̱ baloor. Gun Ãgyoozh bduêm riiñ nim ya̱a̱ de̱ nu nac nu gushni lagy mi de̱. 2 Ndeê nu rzu chu̱ de̱ de coz toê lo nu ricy de̱ ngach. Nunu wachesa̱ de̱ nu gyel rguu. Ni wagne̱e̱ de̱ nu de riidz ni Ãgyoozh ndeê walab coz rishli, sinu rne̱e̱ de̱ du uub la mod nu rishli. Nunu nu mod zeê gric de̱ nu gad lagy de mbecy nañ lardooy nu nap ricy de̱ par lo Ãgyoozh. 3 Nunu benu noow rshaal de̱ de riidz nu rbic gyel mbañ rlyu, orzeê noow zañ par de mbecy nu duneê ziêl. 4 Gun nuras, yu nu nac ñgyoozh ni gyishlombecy ii, bicy yu nu byoow nañ shcab de mbecy nu wagyicy cup consuel, gun orzeê cueê gyet lag dey cuen de riidz nu sac nim, de riidz nu rzat gyel lily ni Crisht. Nunu mi zeê rbic mi nu gad lagy den la na Ãgyoozh, nu nac mod nu na ub mi. 5 Ornu rshaal de̱ de riidz ni Ãgyoozh, walab nu rzat de̱ uba̱, sinu rne̱e̱ de̱ nu Jesucrisht nac mi Shuaan den. Nunu rne̱e̱ de̱ nu de̱ ya̱ naca̱ mbecy nu ricy coz nu rlagy ñi ni de ru nu nac Jesuuz. Ndeê ziêl riiñ nu ricy de̱. 6 Nunu laab Ãgyoozh, biñ nu psaê lagy yaa lugaar zeê nu cow, mi zeê bzeed mi yaa nañ lardo̱o̱ de̱, gun orzeê gad lagy de̱ la na gyel lily nim nu gruu lo Jesucrisht. 7 Tees gyel nap ni Ãgyoozh nu ricy cup de̱ nañ cuerp ne̱, ndeê nañ gal nu na tub gyel nap nu bduê choow mbecy nañ tub gyis yu, gun orzeê gabe nu tonaê la coz ily druu lo Ãgyoozh. Walab nu druuñ lo de̱ ya̱. 8 Mas cyaê la rzac de̱ coz deet, tees walab nu nit loñ de̱. Yuê nu dzi drush de̱ shcab, tees waglazh la consuel ne̱ de̱. 9 Yuê tiem nu rzab mbecy ich de̱, tees Ãgyoozh wacsaan yaam de̱. Yuê nu shiñ ricy nu mbecy de̱, tees wagnit lo̱ de̱. 10 Ca ziêl lugaar nu rded de̱, dub laa tiem zu̱ de̱ lo rishdzidz nu gat de̱ gal nu bzac Jesuuz, gun orzeê rabee nu Jesuuz mbañ mi nu nac de̱ ya̱. 11 Gun lat nu gabee mbañ de̱ ya̱, dub laa tiem rded de̱ lo rishdzidz nu gat de̱ nu nac Jesuuz, gun orzeê nu nac de̱ ya̱ mbecy nu ca lo cuen nu gat, rabee nu Jesuuz zum. 12 Ni mod rded de̱ ya̱ lo rishdzidz nu gata̱. Zeê de ru gad nu cui mbañ der. 13 Nunu rshaal de̱ de riidz ni Ãgyoozh, gun ricy cup de̱ consuel lom, gal nu rniiñ lat de riidz nim. Orzeê rniiñ: “Ya̱ bicy cupa̱ consuel, nunu nu nac ndeê mne̱e̱”, rniiñ. 14 Gun rad lagy de̱ nu Ãgyoozh, biñ nu bicy nu byabañ Shuaan den Jesuuz, niê ziêl gyicy mi nu gyabañ de̱ ya̱ nu Jesuuz. Nunu gyicy mi nu tublaazh la gyecha̱ê de̱ gal nu de ru lom. 15 Orzeê dela coz nu rzac de̱, ndeê par de ru, gun orzeê dub gal nu nap ricy nu Ãgyoozh mbecy, orzeê niê yuê mbecy nu cuic yu gras nim, gun orzeê rabee nu dzi zily nac mi. 16 Ndeê nu washiêñ de̱ baloor. Gun mas cuerp ne̱ de̱ dzach ded niñ, tees tub dzi ga gyafert zir de̱ nañ lardo̱o̱. 17 Coz nu rzac zi̱ de̱ gyishlombecy ii na, nii walab coz nu dzi biigy. Nunu dzach ded niñ. Tees nu nac nu rzac zi̱ de̱, ndeê nu gad gyel lily ne̱ de̱ nu rila walazh. Nunu gyel lily nu gad ne̱ de̱, ndeê tonaê la coz ily par de coz nu rzac zi̱ de̱. 18 Gun wagyicy cuen de̱ de coz nu rzac urlo de̱ gyishlombecy ii, sinu ca lo̱ de̱ lo de coz nu wacsaca̱. Gun coz nu rzac de̱, ndeê coz nu ded ni. Tees coz nu wasac de̱, ndeê coz nu gzu tub la.