2 Tesalonicenses 1

1 Ya̱ Baly, nu Silvano, gal nu Timoteo tublaazh la zeed de̱ gyicy ii lo de ru bicy na nu nac Crisht nu yuê gyedz Tesalónica. De ru mbecy ni Ãgyoozh, Uz den, gal nu Shuaan den Jesucrisht. 2 Ãgyoozh Uz den nunu Shuaan den Jesucrisht gyicy mi faboor nu nap gyicy num de ru, nunu gyicy mi nu cheti ri añ ni der. 3 Der bicy na, rlagy ñi nu dub laa tiem gric de̱ gras ni Ãgyoozh nu nac de ru gal nu yad ñi, gun tub dzi ga zaab gyicy cup zir der consuel lo Crisht, nunu zaab ca zir der de losaêr. 4 Ndeê nu de̱ ya̱ ryabica̱ gyel mbecy ni der ornu rdo̱ riidz nu de mbecy ni Crisht nu yuê gal reñaê lugaar. Ryabic de̱ gyel mbecy ni der nu nac nu rzu fert der, nunu nu nac nu ricy cup der consuel lo Crisht lat nu rshet zi mbecy de ru nunu lat nu rzac deet der. 5 Nu nac de nu ndeê, rabee nu Ãgyoozh dzi seêñ ricy mi ornu ri beem ni dela mbecy, gun orzeê niim nu yad ñi ni der nu chuêr lat de mbecy nu riib ic mi, gun de ru rzac zi der nu nac nu riib ic mi der naa la. 6 Gun Ãgyoozh dzi seêñ ricy mi. Ndeê nu gyicy mi nu gzac zi de mbecy nu rshet zi de ru, 7 nunu gyicy mi nu nap chesu nap lagy de ru, de mbecy nu rzac deet. Niê ziêl gyicy num de̱ ya̱. Ndeê gyicy mi ornu shuub dzi nu gruu zac Shuaan den Jesuuz. Gruum gal gyibaa lat lyush gyi nu cyid mi. Nunu cyid mi lat de anc nu dzi rcyiiñ nim. 8 Orzeê cyid mi par nu cuic mi cashtig ni de mbecy nu a̱ê yuê lo Ãgyoozh, gal nu ni de yu nu wacsuub gyidag de riidz nu sac ni Shuaan den Jesuuz. 9 Zeê cashtig nu cuic mi zeê, ndeê nu shiñ gzac dey tub la. Orzeê chuê dey reñaê lugaar. Wayuê dey zeê nu rcyiiñ Shuaan den Jesuuz. Ni wayuê dey zeê nu yuê gyel lily nim. Ni wayuê dey zeê nu ricy mi coz ily. 10 Cuic mi cashtig ni dey ornu cyid mi gal dzi nu blosu Ãgyoozh. Gun orzeê dela mbecy ni Crisht gyabic dey gyel mbecy nim, nunu cha nu ic dey nu dzi zily nac mi. Niê ziêl gyicy gazaê de ru, de mbecy nu guña lagy de riidz nu mne̱e̱ de̱. 11 Ndeê nu zaab rdiñ la̱ de̱ lo biñ nu nac Ãgyoozh ni den nu gyicy mi nu gyap der nu gac ru mbecy nu blosum nu gruu mbañ. Mi zeê gyicy mi nu gac zaê lo der dela coz nap nu rlagy ru gyicy ru, gal nu de coz nu gyicy der nu nac nu ricy cup ru consuel lo Crisht. Ni gyicy mi nu nac nu dzi fert mi. 12 Ni mod rne̱e̱ du̱ de̱ Ãgyoozh, gun orzeê gyabic mbecy gyel mbecy nim nu nac de ru, nunu gyabicaê dey gyel mbecy ni der nu nac mi zeê. Ni gyicy dey dub gal nu na faboor nu ricy Ãgyoozh gal nu Shuaan den Jesucrisht num de ru.