Hechos 20

1 Na ornu guca de gyel deet zeê, orzeê Baly bicy tublaazh yu de mbecy nu ricy cup consuel lo Crisht. Orzeê briic yu consef ni dey. Orzeê despuees mniiy ñgyoozh nuy dey. Orzeê bruuy zay par Macedonia. 2 Lat nu zay de lo yu ni Macedonia, dzi briic yu baloor ni de mbecy ni Crisht. Orzeê briy Grecia. 3 Zeê pcyiiñ yu chon beey. Na ornu bzu lily yu nu chay par Siria nañ tub barc, orzeê gud lagy yu nu de mbecy Israeel psaap dey riidz nu shiñ gyicy nu dey yu. Orzeê mnii tooy nu cush cyay, ded yu lo de yu ni Macedonia tuubaê tir. 4 Sópater, tub mbecy Berea, gua nuy yu. Yu zeê iêñ Pirro. Niê ziêl reñaê mbecy gua nu dey yu. Gush lañ: Aristarco, nu yu nu la Segundo, cyup de yu zeê mbecy Tesalónica, nu Gayo, tub yu Derbe, nu Timoteo, nu Tíquico nu Trófimo, cyup de mbecy zeê bruuy lo de yu ni Asia. 5 Orzeê de mbecy zeê za ga la dey par lo de̱. Za dey tub gyedz nu la Troas. Zeê blez dey de̱ ya̱. 6 Zeê de̱ ya̱, ornu bded saê nu row dey gyishtily nu sac lebadur, orzeê guê de̱ nañ barc. Orzeê bruu de̱ Filipos za̱ de̱. Na ornu bzaê gaay dzi, orzeê bri̱ de̱ Troas. Orzeê byatublaazh de̱ nu losa̱ê. Zeê pcyiiñ de̱ tub sman. 7 Orzeê dzi loga la ni sman byatublaazh de̱ nu losa̱ê nu da̱w de̱ gyit mod nu bzeeñ Jesucrisht. Orzeê Baly pshaal yu riidz ni Crisht lo de mbecy. Zaab rnii lay lo dey gashtal or guzeel rel, gun tuubaê dzi gyay. 8 Orzeê byatublaazh de̱ nañ tub yuê nu zub gya ni tub yuê chon shily. Zeê rca gyi ni zañ candiil. 9 Zeê zub tub yu feñ nu la Eutico. Zub yu ruê bentan. Lat nu rnii Baly, orzeê tonaê la byeed pcaal yu gashtal por fi̱i̱ gush la pcaal yu, gun Baly dzi tuñ mniiy. Orzeê bruuy gal shily chon ni yuê zeê. Bet lag yu gal lo yu la. Orzeê pshes nañ dey yu gut lay. 10 Orzeê Baly bet yu par lo yu. Orzeê gusaab tiily yu. Bduê yaay yu. Orzeê nay: âCueê dzib der gun gabee mbañ yu ânay. 11 Orzeê gupaêy laab gal gya zeê bdow nuy dey gyit mod nu bzeeñ Jesuuz. Despuees orzeê chi bee nuy dey riidz gashtal briib la doo. Gazeê nu bruuy lo dey zay. 12 Orzeê ya nu dey yu feñ zeê par yuêy mbañ yu. Orzeê guud baloor ni dey. 13 Orzeê bzeeñ Baly de̱ ya̱. Gazeê nu gu̱ê de̱ nañ barc za̱ ga̱ de̱ lo par Aso. Zeê chuê Baly nañ barc. Ni mniiy nu gyicy de̱, gun rlagy yu chay gyiê lay par Aso. 14 Na ornu bdzeel de̱ Baly Aso, orzeê guêy nañ barc. Orzeê za̱ de̱ par Mitilene. 15 Orzeê zeê bru̱u̱ de̱ za̱. Orzeê tuubaê dzi bri̱ de̱ Quío. Gal tuubaê dzi bri̱ de̱ Samos. Zeê bzu lagy de̱ Troguilio. Orzeê tuubaê dzi bri̱ de̱ Mileto. 16 Gun Baly bduê ic yu nu ded nez ziêl yu Ãfeso, gun orzeê cueê ganda̱y yu lo yu ni Asia, gun gyeel riy Jerusaleeng, gun dzi ga dugyi ruêy saê ni Pentecostés. 17 Orzeê lat nu ri Baly Mileto, bzeed yu raso̱o̱ za nu mbecy par Ãfeso. Mniiy nu cha de yu bel ni de mbecy ni Crisht nu cha cheel dey yu. 18 Na ornu bri dey, orzeê nay rab yu dey: âDe ru rad lagy der la coz bicya̱ nese dzi loga la nu bri̱ de lo yu ni Asia. 19 Dub laa tiem nu pcyiiña̱ lat der bicya̱ coz nu mnii Shuaan den lo̱. Nunu rila wangyale̱ê, sinu bicya̱ riiñ zeê tiem nu deet rac. Nunu tiem zeê tonaê la bicy shni̱ par nu nac de coz a̱ê nap nu psaap de mbecy Israeel riidz nu ñgyicy nuy ya̱. 20 De ru rad lagy der nu ya̱ rila wancheca̱ nu ne̱e̱ ni tub la coz nu rlagy ñi nu locyuuba̱ der. Tees ya̱ pshaala̱ de riidz ni Crisht, nunu blyu̱u̱ ni der lat de mbecy zigy gal nu nañ yuê ni der. 21 Blyu̱u̱ ni de mbecy Israeel, nunu tant blyu̱u̱ ni de mbecy nu walab mbecy Israeel. Ya̱ mne̱e̱ lo dela mbecy nu rlagy ñi neê dey de cyi nu ricy dey, nunu gyicy yu coz nu rlagy Ãgyoozh. Nunu rlagy ñi gyicy cup dey consuel lo Shuaan den, Jesucrisht. 22 Orzeê na cha̱ par Jerusaleeng gal nu mnii Espiriit Yon ni Ãgyoozh lo̱ nu gyicya̱. Ni wagad lagy ya̱ la coz zaca̱ re. 23 Tub zi la coz rad lagy ya̱. Nu dela gyedz nu rdeda̱ Espiriit Yon ni Ãgyoozh rniim lo̱ nu gyet laga̱ nañ yuê gyiib, nunu zañ coz deet zaca̱ de zeê. 24 Tees ya̱ rnii to̱o̱ nu se la la saca̱ nu cyiiña̱ gyishlombecy ii, benu chi ga ndeê gyicy ñi nu shupa̱ laza̱, nunu zaê lo̱ de riiñ nu briic Shuaan den Jesucrisht nu gyicya̱. Riiñ zeê ndeê nu shaala̱ de riidz nu sac nu bruu lo Ãgyoozh, de riidz nu rniiñ nu dzi coz nap ricy nu Ãgyoozh de ub na. 25 ‘Ya̱ gusa̱ mne̱e̱ de riidz ni gyel gubier ni Ãgyoozh lat der, nunu na rad lagya̱ nu rila wazacaê der ya̱. 26 Ndeê nu dzi na ya̱ ne̱e̱ lo der, benu yuê mbecy bduneê lat der, ya̱ sac falt ne̱. 27 Gun ya̱ mne̱e̱ lo der dela coz nu bloo ic Ãgyoozh nu gyicy mi, nunu wancach ru̱ê ni tub lañ. 28 Bicy cuidad der ub ru, nunu bicy cuidad der nu de mbecy zigy nu bzeeñ Ãgyoozh nu ña der. Ãa der dela mbecy nu ricy cup consuel lo Shuaan den, biñ nu brish cyi den nu nac nu pshum reñ mi. 29 Ya̱ rad lagya̱ nu despuees ornu ru̱u̱ lat der, cyid mbecy a̱ê nap. Gyicy yu nu laa yaa de mbecy ni Crisht de coz rishli. Na dey gal na lob dañ nu nit lo ma shily. 30 Shuub dzi nu ruu la be mbecy rguu lat der. Lyuu dey coz fals, gun orzeê de mbecy ni Crisht cha cay ich yu. 31 Cuidad der, nunu cueê nit lagy der nu dzi rel la ya̱ blyu̱u̱ ni der nu nis lo̱ nañ chon ñaên lat nu tonaê la bzac zi̱. 32 ‘Orzeê der bicy na, ya̱ zeeña̱ der yaa Ãgyoozh nu ñam der. Nunu ya̱ drish lo̱ nu de riidz nu rnii de coz ily nu ricy Ãgyoozh locyuub ñi de ru, gun gyicy fert ñi der, nunu gac cuic ñi dela coz nu bzu chum par dela mbecy nu bi pcuim nu gac nim. 33 Ya̱ rila wansaab lagya̱ ni tiñ ni mbecy, ni de shab mbecy. 34 Gun de ru nap rad lagy der nu ya̱ bicya̱ riiñ par nu gad coz nu rlagy ñi ne̱, nunu coz nu rlagy ñi ni de yu nu gusa nu ya̱. 35 Dub laa tiem rlyu̱u̱ ni der nu ni mod rlagy ñi gyicy den riiñ, nunu locyuub den de mbecy nu ricy falt la coz ni. Byezaê lagy der de riidz ni Shuaan den Jesuuz ornu nam: “Gacyit zir lagy mbecy ornu cuic yu coz ni losaêy gazeê ornu gash yu coz nu cuic losaêy niy”, nam âna Baly. 36 Na ornu blazh mnii Baly de ndeê, orzeê gusu tib yu nuy dey. Mnii nuy Ãgyoozh nu dela dey. 37 Orzeê dela mbecy biiñ yu, nunu bduê yaa dey yeñ Baly. Nunu bdow dey chit lo Baly. 38 Tonaê la bicy shni dey, gun mnii Baly nu wazacaê dey yu. Orzeê za nu dey yu gashtal lo la barc.