Apocalipsis 20

1 Orzeê bzaaca̱ tub anc bet yu nu bruuy gyibaa. Orzeê yu zeê zu yaay ya gyiib ni gabily. Nunu nuu gaêy tub caden ily. 2 Orzeê anc zeê bicy yu gan low dañ zeê. Laab ma zeê nac ma bily nu nil zu nese gulas. Nunu nac ma nuras. Nunu nac ma nushow. Orzeê ma zeê pcyiig yu ma nu caden par tub miily ñaên. 3 Orzeê pshet lag yu ma gyerye ily nu rnii dey gabily. Orzeê psoow nicy yu roê niñ. Orzeê pcaay tub beey loñ. Gun orzeê cueê gaê nu gad mod nu guu ma de mbecy nu yuê de lo la nasyoong gashtal zaê la tub miily ñaên. Na ornu lazh tub miily ñaên zeê, orzeê rlagy ñi nu dulaa ma par ñuu zi ziêl tiem. 4 Orzeê bzaaca̱ de yashily zeê nu gyub ic mbecy. Nunu bzaaca̱ de mbecy nu zub lo de yashily zeê. Orzeê Ãgyoozh briic mi rishbeey nu gri bee dey ni losaêy. Orzeê niê ziêl bzaaca̱ de espiriit ni de yu nu pcyug mbecy too nu nac nu bzat dey Crisht nunu nu nac nu pshaal dey riidz ni Ãgyoozh. Orzeê de yu zeê wanriib zily dey ni bañ dañ zeê ni nab ma. Ni wanca beey ni ma cyuga dey, ni yaa dey. Orzeê de yu zeê byabañ dey. Orzeê byub ic dey tublaazh la nu Crisht par tub miily ñaên. 5 Deê zir de mbecy gut wangyabañ dey gal bzaê la tub miily ñaên zeê. Ndeê tir loga la nu gyabañ mbecy. 6 ¡Dzi ni de mbecy benu gazaêy gyabañ yu tir loga la! ¡De yu zeê nac yu mbecy ni Ãgyoozh! Sacaê mod nu gat dey tuubaê tir. Orzeê de yu zeê gac dey uz nu gzu riiñ lo Ãgyoozh gal nu lo Crisht. Nunu gyub ic dey tublaazh nu mi zeê tub miily ñaên. 7 Na ornu zaê tub miily ñaên na, orzeê dulaa nuras gruuy nañ gyerye zeê. 8 Orzeê yu zeê cha guuy de mbecy nu yuê dela nasyoong nu yuê dutuub la gyishlombecy. Cha guuy nasyoong Gog nu Magog. Orzeê gyicy tublaazh yu dey par gyel yuu. Zigy dey gac yu gal nu nguaa yu uzh ruê nisyudoo. 9 Orzeê rush las dey dutuub la gyishlombecy. Orzeê ri loê dey lugaar zeê nu gyeche de mbecy ni Ãgyoozh. Nunu ri loê gaê dey gyedz nu dzi rcam. Orzeê gruu gyi gal gyibaa gyet ñi. Orzeê ndeê nit loñ dey. Orzeê gyaê lo dey. 10 Orzeê nuras, yu nu bguu de yu zeê, orzeê shet lag dey yu lo tub gyel ni gyi nu asufre. Orzeê bañ dañ zeê gal nu mbecy fals nu rnii por cuen ni Ãgyoozh zeê, de yu zeê bi bet lag dey gyel zeê anzir. Orzeê lugaar zeê gzac zi dey dzi rel la par tub la. 11 Gazeê nu bzaaca̱ tub yashily. Zily nac ñii. Nunu caacy ñi. Nunu bzaaca̱ biñ nu zub lo yashily zeê. Lat nu zub mi lugaar zeê orzeê mnit gyishlombecy, nunu mnitaê gyibaa. Orzeê wacabee la ca zañ. 12 Orzeê bzaaca̱ dela mbecy nu bi gut nu zu par lo zeê nu zu yashily zeê. De yu lily, nu de yu gyidz, dela dey zuy par lo yashily zeê. Gazeê nu byaal lo de libr. Orzeê niê ziêl byaal lo libr nu taê nu la de mbecy nu cui mbañ. Orzeê de mbecy nu bi gut duri bee ni dey dub gal mod nu bicy dey gal nu bi cañ lo de libr zeê. 13 Gazeê nu dela añ nu ri lo nisyudoo bruu zacaê dey, nunu dela añ nu yuê lugaar zeê nu yuêy bruu zacaê dey. Orzeê tub ga la dey duri bee niy dub gal nu na coz nu bicy dey. 14 Orzeê lugaar zeê nu cha mbecy ornu gat yu, lugaar zeê bet lag ñi lo gyel ni gyi zeê. Gyel ni gyi zeê, ndeê lugaar nu rnii dey nu gat mbecy nu cyupaê. 15 Orzeê cyu ziêl mbecy nu sac nu la lo libr nu taê nu la de mbecy nu cui mbañ, orzeê de yu zeê gyet lag yu lo gyel ni gyi zeê.