Efesos 4

1 Ngko Anɨtuye syoho iwoênɨngkohe soêno impoêangomo humale sohwoêni sekumo jomo yokumpohnênyo selalokweno. Anɨtu kakoe mehomi hnênɨmneêno wonyoangkafo humayo soêno joho nalɨmentiso soêno kakoe yahino wonyoangkafo somo ntoêno unɨngkohwano. 2 Aêamu hopiênonohino somo sekwo enjwaêmo pahumno. Aêamu somo foêma foêma ulohofɨkuji hungkuno hofiyo hofohofahnêno ulɨmno. Aêamuso hofɨko wonyo sekumo selohofɨkujoêno sekwo oso wonyo hiso aku ulohofɨkutoho. Oêo, wopɨngoênohini ulohopmno. Sɨmeho finɨmno. 3 Anɨtuye Towahuno Wopɨngo sohwo kako sɨmeho afa inyo yahino nejapmmentiso soêno nakwo mtitofo angaênohino paênyo impe hopa nto monakiloêmokumaho. Oseso oso sɨmeho afa inyo yahino neêno mjimɨkuno. 4 Nakwo Anɨtumo sɨmeho uyɨwoênɨngkuhwone hnênwi nakwo hinjohoênwi aêapaho angaênohinoênwoho. Anɨtuye Towahunoso angaênohino hweho. Nakwo hopiênonohino hnênwi nakwo Anɨtuênji wonyoangkafopo humayo soêno Anɨtu nakumo joho lonetɨmaêmentiso soêno nakwo oso hisoêno afaênohini hontohumalohwono. 5 Nakwoe Hwe Engo Jisas Kɨlais sohwo angaênohino hweho. Nakwoe sɨmeho hiêntnnohino uyo yahinoso Anɨtu uhwononteso angaênohino weho. Mijo kiyomayoso Anɨtu uhwononteso hwapɨngo neso kengaênohinofoho. 6 Nakwoe Mpohwo angaênohino sohwo Anɨtuyoho. Nakwo hopiênonohino hnênwi kakimo enjwaêmo humentanɨngkuhwoni kako yokintahopo humaho. Kako nakwoênjo ajwopo nohumanto yoêmayo neêmanteso kako wopɨngo namokuwoênɨngkiso hweho. Kako nakwoe sɨmehomo humaho. 7 Nakwo angaêno angaênohino hnênɨmo Kɨlais kako kakoe syoho kengo kengo nejaponte soêno kako yokumpohnênyo hwapɨngo sohwo oso syoho hiso iyoêneso yokumpohnênyo nejapmmentisofoho. 8 Olo hilo soêno Anɨtuye hungkuno ole nalɨmento, Kɨlais kako songo lɨkafonto ahwomomo apaêno sɨmentiso sohonta kako kakoe aêamu piênɨngoso Seten kako impe intofahumentiso somo isɨhutofomotasɨmentisofoho. Osohonta kako aêamu somo yoêmayo syoho kengo kengo iyosoêno yokumpohnênyo uyɨmentisofoho. Ose nalɨmentisofoho. 9 Oso hungkuno soêno huno wosyofɨsyano. Kako ahwomomo apaêno sɨmentiso soêno neso pehoto. Olenoho. Sɨmoêmo kako ahwomo mtaêni noponto hwaho ne lopo pmmentisoso kako hwahomoêmo aêamu poyo peênyofe angomo umentisofoho. 10 Olo hwe lohwo kako sɨmoêmo hwahomoêmo umentiso sohwo kako aku ahwomo ne nohotɨmo sɨmentisofoho. Sɨmentiso soêno kako yoêmayo hopiênonohino ahwomomjo soênji hwahoponjo soênji hwaho aeêmjo yoêmayo hopiênono Kɨlaisɨmo weho. 11 Anɨtuye syoho kengo kengo iyo soêne Kɨlais kako aêamu angaêno angaênohinomo yokumpohnênyo uyalofoho. Oso yokumpohnênyoso olenoho. Aêamu fisomo kakoe hungkuno uyohojɨkuêmofoêne (apousel) syoho uyalofoho. Nomêni somo Anɨtu hungkuno joêne syoho uyalofoho. Nomêni somo aêamu Anɨtuye honɨngkanomo tɨpemayoêne aêamu somo ufoêmayoêne syoho uyalofoho. Nomêni somo Anɨtuye aêamu ne somo mokosyohumayo soêne kakoe hungkuno lutɨhwayoêne syoho uyalofoho. 12 Oso yokumpohnênyo nejopalokunjoso Anɨtuye aêamu neso hofɨko kakoe syoho hofiyo ulohofiyoêne ntoêno esyohumaho. Osoêno nakwo Kɨlaisɨye aêapaho ne hnênwi nakwo yokumpohnênyo angaêno angaêno sosofitoênɨngkuhwasi ufoêmoênano. 13 Kɨlais kakoe yokumpohnênyoso neêno nejapɨwoênɨngkiso soêno nakwo Anɨtumo sɨmeho hiêntnnono uyɨwoênɨngkuhwone hnênwi nakwo sɨmeho afa unantanoho. U nakwo Anɨtuye hwomumneêno huno afaênohini wonayɨmtonoho. Oso hohosohonta nakwoe sɨmeho moêmo Anɨtuye hungkunoênji Anɨtuye hunoênji nakwoe hunomo engo enaofɨhwosoêno nakwo Kɨlais paênyo sokafo umoênantanoho. 14 Osohonta nakwo mehomi paênyo mohumanehwono. Aêamu mehomi paênyoso hintalinyo ifofo mokomoiso hopa mokomoyalofoho. Hofɨkoe huno somo ehiloêmemokomoyalofoho. Aêamu afofo hungkunoênji hwasyo hungkunoênji selalokwofoso hofɨko oso ifofo hopa sekumo umpoênosetɨmantɨfeêno yalokwofo. Osomo sekwo tɨfi inɨngkakutoho. 15 Oêo, nakwo Anɨtuye hungkuno ne somo neêno inɨngkohwasi aêamu hopiênonohino soênji sɨmeho inɨngkuhwasi Kɨlais nakwoe mnokino engoênjo sohwoe yahino wopɨngoso nakwoe sɨmeho moêmo engo wenaoêmontonoho. 16 Kɨlais kako nakwoe mnokino paênyo hweho. Nakwo kakoe sɨfe aho yoêmayoso paênyoênwoho. Mnokino sohwo kako aêapaho sohumo huno uyahonɨngki aêapahoso syoho itoêno iwoênɨngkisofoho. I aho sohwo kako syoho ntoêno miyoêmanji ajoêmiyo sohwa hofɨko syoho ntoêno mifitnnehofo. Osoêno Kɨlais kako syoho kengo kengo nejapmmentisoso nakwo angaêno angaênohino hnênwi syoho ntoêno ihwasi nakwo ufoêmoênantanoho. Ose ihwasi sɨmeho afa inɨngkuhwasi Kɨlaisɨye aêapaho hnênwi engo imoênɨngkuhwasi yokumpohnênyo wolohofantanoho. 17 Olo hungkuno loso ngko Anɨtumneêno yokumpohnênyo waselɨmonneêno yohono. Aêamu hwahoponjoso Anɨtuye hungkunomo hwotoho fewoênɨngkohofo oso paênyoso sekwo imoênɨngkutoho. Hofɨkoe hunoso siki woênnyofoho. 18 Hofɨkoe huno pɨkuênnyo soêno sɨkwoêmjoho paênyofoho. Hofɨko yokumpohnênyo imoênontɨfi hunoêmasoso hofɨko Anɨtu kakoe songo humayoso momalokuyohofo. 19 Hofɨkoe honɨngkano wonyo somneêno hofɨko wonɨmango munyofoho. Oêo, hofɨko honɨngkano wonyo somo ikuhufokuêmoênyofoho. Yoêmayo yahino wonyo somneêno sɨmeho fefoyo uyalofoho. 20 Oso yahino hiso Kɨlais losetɨhwamentisotaho. Nɨhuêno awonoho. 21 Kɨlaisɨye yahino wopɨngo soêno sekwo nupaênontɨfi oso yahino homo somo tɨfi inɨngkowahonɨngkofi aêamu Jisasɨye hungkuno neso nto losetɨhwamentohofofoho. 22 Osoêno sekwo sekwoe hohontajo yahino wonyoso nɨhuênahone fohoênaopmno. Yoêmayo wonyo sekwoe sɨmeho umo lɨmojoso olenoho. Sekwoe hunomnohini inɨngkawentɨfi yoêmayo hi semoênyoso honɨngkano hwasyomo ipesemotamojofoho. Oso hiso sekwoe hunomo wonyo semokumojofoho. Oso yahino wonyoso nɨhuênahone fohoênaopmno. 23 Sekwoe hunoso sekwoe sɨmehoso nɨhuêno songo umoênono. 24 Sekwo aêamu soku songo hmmoênɨmno. Oso aêamu songo soku Anɨtu kako paênyo wasemokumontonoho. Oso aêamu songo hiso wonyo honɨngkano nɨhuêno anefoho. Yahino itoênohinofoho. 25 Oseso sekwo hwasyo hungkunoso fohoênaopmno. Apaêno nolɨkutoho. Sekwo hungkuno nehopiênohino fihnnɨmno. Sekwo huno ole seyohi, Nakwo Kɨlaisɨye aêapahoênwoho. Osoêno hungkuno nehopiênohino fihnnɨmno. 26 Sekwo sekwoe sɨmeho wonyo semoênɨngkuhwosoêno huno ntoêno fɨsyafɨhupmno. Sekwo honɨngkano wonyo ifitnnoho. Sekwo sekwoe sɨmeho tohino nowentanɨngkuhwosi mofehiênyo ikwoêmokoloho. 27 Aêamu sɨmeho wonyo umoênɨwoênɨngkiso osohumo Seten ehuhnnaofɨwoênɨngkisofoho. Osoêno sekwo Setenɨmneêno hokuêyo nohwosomputɨmafɨkutoho. 28 Aêamu yoêmayoso hufo iwoênɨngkiso sohwo kako apaêno hufo ihwoloho. Oêo, kako syoho wopɨngoênohini wotɨpemano. Oso syohoso kako kakoe ahoênji yokumpohnênyo ihwosi hamniyoho nomahwosi kako aêamu umofonyo iyo somo ufoêmano. 29 Sekwoe mango mtaêni wonyo hungkuno nolɨkutoho. Oêo, hungkuno wopɨngoênohini nomêne aêamu somo usosofitofoêne filɨmno. Aêamu nomêne somo ufoêmayoêne hungkuno wopɨngoênohini filɨmno. 30 Sekwoe humayo yahino soêno Anɨtuye Towahuno Wopɨngo sɨmeho tango ifisyɨmofɨkutoho. Anɨtu kakoe Towahuno Wopɨngo yofe nahwofoêne nejapmmentiso soêno nakwo huno ole nayohi, Oso sɨkuno aeêuyo somo yoêmayo yahino wonyo somtaêni nɨhuênahone isɨhutofonemaso sohonta nakwo Anɨtuênji wopɨngo humanefoho. Huno ose nayohoho. Osoêno Anɨtuye Towahuno sohumo sɨmeho tango ukutoho. 31 Sekwo olo yahino loso fohoênaopmno. Sɨmeho wonyo, yoka, sɨmeho tohino, mango engo, sitofo, oso yahino wonyoso ikutoho. 32 Sekwo aêamu somo sɨmeho uyɨkuji yahino wopɨngoênohini ulohopmno. Kɨlais sekumneêno poyo peênɨmentiso soêno Anɨtu sekwoe wonyo wae yasemaêmentiso hopaso aêamu fiso hofɨko wonyo selohopijo somo hohujoêmo mohoênaofɨkuji wonyo hiso wae hmmopmno.