Paisowa 12

1 Fuyanna yai mate Kin Heloda ya fatubu tau kawawananaha haisa ya abidi be ya fahisu faheyayadi. 2 Ya liba be Diyon hidana, Diyemsi, baineti yai sa wunui, 3 yo ya ita mate Diusi dodogadi nuwadi sa amna yo fede ya lau Pita hinaga ya au. (Ena fuya anêauêau mate Fwalawa Fafayisti Gesana Anêangogona yai.) 4 Pita sa au mulina yai, sa gudu buluhi deli yai. Amainiya tau ita wata pele fati, na pele hesa - hesa ganahewana yai mate dodoga fati; pele hesa be ana fuya ya ita wata. Heloda ena nuwatuhu mate Bayawa Anêangogona ai mulina haba sa foyahi lawen be sa falau fatala dodoga ai matadi. 5 Pita deli yai hola sa abi didini, na tau kawawananaha mate enehena sa anêeta adidili Yaubada lisina yai. 6 Heloda bobonna Pita haba ya falau fatala na Pita mate iêipa yai ya laulau eno gati luwaga atiêatipudi yai. Sa auêaui seni luwaga yai na gati luwaga hinaga mate deli edaêedana hafohafona sa ita watan. Bobonna habahim, Heloda, Pita haba ya falau fatala. 7 Maêesega na, Yaubada ena anelu ya taumahata yo mala ya sina deli ganahewana yai. Anelu ya abilau Pita lisilisina yai na ya fanohi iyen, U obiyo! Feula! Yo fede, seni nimana yai sa taufahi. 8 Habahim anelu iyen, Am bwaêulu u au yo am bwaêi dala u liêodi. Be Pita ena liba ya lau watan. Anelu iyen, Am luhuluhu u luhufi be u lau watanigu. 9 Pita anelu ya lau watan be sa lau deli bilina ganamulina. Anelu somo ya ginaginauli mate wananahana, na hige i sibai. Ena nuwatuhu bena haga tautau ya itaêitai. 10 Gati bwaêibwaêina yo gati mulimulitana sa bayawaidi be sa mahano lau taon edaêedana yai. Na ana gudu aiyan yai sa ginauli mate ibona ya tasoêe be sa lau ganamuli. Edaêeda esega sa lau watan, yo fede anelu ya lau afulen. 11 Habahim, Pita ya nuwatuhu lobahi, be iyen, Matabahim, E siba wananaha mate Guyau ena anelu ya duiyama be Heloda nimana yai ya fofofahigu yo Diusi somo bena sa ginauli lisigu yai, ibege i tubu. 12 Fuyanna ya nuwatuhu lobahi, yo fede ya lau Diyon Maleko tinana hesana Maliya ena luma. Amainiya boludi sa faêoigogo be sa laulauêuêula. 13 Pita aba luhuluhu lau edaêedana yai ya oiêoi, yo fede tau lau fayofayo waihinina hesa hesana Loda ya laoma bena edaêeda ya soêe. 14 Pita alinana ya atahi lobahi mate nuwana ya amna, in moho edaêeda hige i soêe na ya lautafo ya fuyo be ya falibadi iyen, Pita mate edaêeda hafohafona yai ya obiêobiyo. 15 Tiyen, Bena u kabakabaleya! In moho ya duduwen iye, Wananaha! Hige ya bwala. Na alinana sa bui, tiyen, Mate, ena anelu. 16 In moho Pita hola edaêeda yai ma oiêoina. Fuyanna edaêeda sa soêe be sa ita mate sa tauhiti. 17 Pita nimana yai fafaêilala ya ginauli be gagali sa fatautau. Habahim sidohana deli yai Guyau ya foyafahi enehedi ya dede iyen, Diyemsi ma afa haidana edi au liba. Habahim ya lau afuledi na ya lau nuêu hesa. 18 Hwalahwalalana tau hiyala sa nuwa ponopono na tiyen, Pita sidohana ena laulau? 19 Heloda ya falibadi be sa yoêoi. In moho hige gonowadi ti lobahi. Habahim gati ya fatiêo fifisidi be ya liba bena sa wunuidi. Mulina yai Heloda Diudeya Nuêuna ya lau afulen na ya lau Sesaliya yai ya miya begana. 20 Heloda mate Taya yo Sidon dodogadi ya manabalaêedi. Yo fede sa faêoi esegahidi na sa lau be sa ita. Bwaêibwaêina mate Kin ena luma tau ita watanina hesana Belasetu sa nuwa oiêi be haba ya saguhidi, paêana adi kalahe mate Kin ena nuêu yai ya laolaoma. Logena sa lau Heloda lisina be nuwa esega sa anêetai. 21 Lahaina sa golu Kin Heloda ena leli ya liêodi. Habahim ena aba taêai loholohona yai ya taêai na ya libaliba. 22 Na dodoga sa yogayoga tiyen, Hige doga i libaliba. Itete yaubada hesa! 23 Heloda Yaubada hige i faêatitiyen be hige walolona Yaubada ena anelu, mwatamwata ya yala fafinahe be sa an funuhi. 24 In moho, Yaubada wasana ya laêi yo ya tadada. 25 Yelusalem yai Banabasi yo Saulo adi paisowa sa faêofi be sa fuyo Antiyoka maêedi Diyon Maleko.