2 CORINTHIANS 4

WBT

‹ Chapter 3 2 CORINTHIANS — All Chapters Chapter 5 ›

1 Tominkaru kamunan-kidan idi�o waunao wuru�u, uzaamatanuz waunao kaudina�o nii pa�ati, kowaadapa�o nii umanawunu�o kuwai. Uruu idi aonaa wakashadinan na�iki aonaa wadakotan wamuudan wuru�u kaudin-kizaiz. 2 Mishi�oraiman õgaru na�iki õmin-kaudinannao na�apa kida wadi�itinpan, aonaa waaipan wadizapan aimaakan u�ai oo washa�apatan mani aimaakan kakiba�azonnaa kida�o, na�iki aonaa waaipan wamariidapan pidannao wakuwaa ida�an. Tominkaru awun za�a mishi wakowaadapan uparadan sakitapa pidannao ati. Ipai pidannao abatainao kida wakuwaa, ĩaitapa na�iki ĩtukapa mishi�o wuru�u wakowaadapaniaz kuwai. 3 Mazan aizii Kaimana�o Kuwai wuru�u wakowaadapaniaz, umainaabanan an, mazan umainaabanan soo wunao ati�i mamishida-kainaouz, maabata�azoo-kainaouz Kaimana�o Kuwai, uruu idi ĩpataka�uta-kao nii. 4 Satan, tominkaru-tinpa�oraz imi�i baara�a, uruu wuru�u awautapa�oraz Kaimana�o Kuwai mamishida-kainao aitapan aiazu. Uruu idi aonaa ĩtukapan, na�iki aonaa ĩaitapan umanawunu�o ukanadapan ĩ�ida�ati, wuru�u Kaimana�o Kuwai Christ daua�oraz. Na�iki aonaa ĩaitapan na�apa kida�o Christ umanawunun Tominkaru tuma. 5 Aonaa wadaua�o mani karikaonan wuru�u wakakuwaatinanuz, mazan Jesus Christ daua�o pa�an, uruu Tominkaru taaniaz ipai pidannao naobanaa nii. Ukau�an waunao poitoruinaou�u naa karikaonan wakaudinan idi Christ ati. 6 Aizii Tominkaru, dyuudauzoz kanada�o tominan maruta�o-karu iki, uruu wuru�u kanadapa�oraz wanyukunuu iti, waaitapa-kinaa nii Tominkaru umanawunun kandapa�oraz Christ ida�a. 7 Ukau�an kaina�a wa�ida�a wuru�u umanawunu�oraz aitapa-kinai Tominkaru di�iki�oraz, wananaa kakataimanan pu�u, na�apa ka�uz kin kawan toma-kariwai kidaz kubai idi. Uruu ida�an pidannao aitapan nii aonaa wama�ozakan ida�ana�o mani washa�apatinan oo wakowaadapan wuru�u umanawunu�oraz kuwai, mazan Tominkaru pa�an wuru�u taa�oraz wanyukunuu iti umanawunu�o ma�ozaka-kinai. 8 Mishi tuukii wapataka�uta-kao ipai wamako kizi kawana�ati kida, mazan upu�u aonaa na�apa kida�o mashaatan waunao. Panaadon aonaa waaitapan na�apam naa washa�apatinan, mazan upu�u aonaa wadakotan Tominkaru manyukunuutan waunao. 9 Wa�antamikita-kao pu�u dikauda kida�o ida�an, mazan upu�u aonaa wawa�akauzo-kao waba�oran. Washa�apata-kao pu�u kaziwa�o ida�an, mazan upu�u aonaa wazowii-kao. 10 Ipai wakakuwaapatin-kizi kawana�ati waaitapa da�i washa�apata�azoo-kao dikauda�o ida�an. Na�apa kida�o ida�an watiwaa wuru�u Jesus baitauzonii kidaz atii na�apa uzowii-kao. Mazan aonaa watarian washa�apata�azoo-kao ai, pidannao aitapa kizi kaina�a Jesus mashaapan wa�ida�a, uruu ma�ozakadapa�oraz waunao. 11 Wakakuwaapatinan dikin ii Jesus dau�u, maonapa kida da�i wamawakan, mazan uruu ida�an kizi pidannao aitapan kaina�a Jesus mashaapan wa�ida�a. 12 Ukau�an kaina�a maonapa mawaka-karu wa�ida�a, tuukii wazowia�azoo-kao mazan aonaa watarian wamawakan ai, waaipan idi unao zaamatan wuru�u karikaonanu�oraz pa�an kakupa-karu. 13 Na�apa tawuru�u usaadinapanuz Tominkaru kaaritan ida�a, “õmishidan idi�o Tominkaru wuru�u õkakuwaapatinanuz” Waunao na�apa kapam wamishida Tominkaru, uruu idi�o wuru�u wakakuwaapatinanuz. 14 Waaitapa na�iki wamishida Tominkaru kadishita-kidanii wanaobanaa Jesus pamawaka-kizi iki. Ukau�an wamishida na�apa�o nii kapam ukadishita-kidan waunao wamawaka-kizi iki wazaamatinan idi�i naa Jesus di�iti. Na�iki ukadishita-kidan ni�i naa waunao baokopa unao tuma pakanaapu iti. 15 Ipai wuru�u aimaakan wabaiatanii kidaz kaikapa�a unao dikin ia�o, wakaminka�uta�azon idi�o unao. Uruu ida�an kizi powa�a�o zii iriba pidannao aitapan mishi Tominkaru kaimanan, ĩkonaukii-kida kizi uruu, na�iki ĩmanawuntapa kizi uruu. 16 Uruu idi aonaa wakashadinan wakaudinan wananaa mizainan pu�u na�iki ukaakinpan pu�a�a naa. Mazan wadoronaa ii ipai kamo�o wama�ozakadapa-kao. 17 Aizii wadi�itapan an wuru�u wabaiatanii kidaz aimaakan kai, masakauda�u�o karikaonan wuru�u, aonaa karikaonanu�o nii mani, mazan wabaiatinan winipinaa nii kaina�a aimaakan umanawunu�o Tominkaru taapanii wa�ati. 18 Usha�apanum kau�an waunao wataapan wanyukunuu aonaa tukapa-kariwai kida aimaakan dau�ati�o mani, mazan soo wuru dau�ati�o aona�oraz utukapa-kao. Wuru�u aimaakan wabaiatanii kidaz kai, aona�o nii una�an kotua�iki, mazan wuru�u aimaakan Tominkaru taa�azooniaz aona�oraz utukapa-kao, karikaonanu�o nii pa�an una�an.

‹ Chapter 3 2 CORINTHIANS — All Chapters Chapter 5 ›

2 CORINTHIANS 4

Cite / Share This Page