LUKA 14

1 Kilumbu kimosi kya sabata, Yesu wisa dya ku nzu ya mosi wa bapfumu ba Bafwadisi, amana bawu bakala musimbulula yi tsikiningi. 2 Mukwa maladi ma zatu mosi waÌkala kuna thwala yandi. 3 Yesu wuhyudi kwena Bafwadisi yi balongi ba mitsiku: «Mitsiku mibati hana muswa ho lo, wa kubuka mutu mu kilumbu kya sabata?» 4 Kaasi baÌhwena talala. Hanga wumubongi mbefu, waÌmubuka amana waÌmusula kenda. 5 Kunima, waÌbazimbwala: «Nati ha kati dya benu, yukani mwana wandi ho lo ngombi wandi kabwa mu buku dimosi, kakonda mulubula yi tswatsu, mu kilumbu kya sabata?» 6 Kaasi baÌlendaku kuvutula ku kyufu kina. 7 Yesu waÌta kingana kwena batu bana baÌtedisa, kikuma kaÌmona buna bakala sola bifulu bya theti. KaÌbazimbwala: 8 «Yukani bakutela, kwena mutu, ku mikinzi mya longu, wendaku dizakadisa ha kifulu kya theti. Hakala nana ni mutu mosi kuhyoki ngeyi mu lukumu kaÌtedisiki; 9 amana, wuna wulutedisiki benu boodi, kisa kuzimbwala: “Sisila yandi kifulu.” Tsoni wayuÌka mu kwenda dizakadisa ku kifulu kya tsuka. 10 Kaasi tangwa baÌkutedisi, ndawenda sikuka ku kifulu kya tsuka, ndangu mu tangwa dina kakwiÌsa wuna kutedisiki, kakuzimbwala: “Nduku wama, tombuka ku thwala.” Amana bwakaÌla kikuma kya ngeyi lukumu ku thwala batu boosu bana bakaÌla ku mesa ha kimosi yi ngeyi. 11 Kikuma, “wuna wadiÌtombula bamukulumuna; amana wuna wadiÌkulumuna, bamuÌtombula.» 12 Yesu waÌzimbula phi kwena wuna waÌmutedisa: «Tangwa wisi hana madya ma mu suka keti ma mu masikidika, wutedisaku banduku baku, keti baphangi baku, keti bakwa kikanda kyaku, keti bamvwama babana lwabandakana bawu; bakuvutwala nana, kilumbu kina kyakaÌla kya bawu, hanga bakuvutwadi ngeyi phi buna wubasadidi. 13 Kaasi yuka ni wuzodi kuta mukinzi, tedisa baphutu yi bakwa bifu bya mutindu yi mutindu yi bifwa malu yi moku phi yi baphofu. 14 WakaÌla yi kyesi, kikuma beku yi kima bakuvutwala. Mukuma, wafuÌtama tangwa bafuÌtumuka batu basungama.» 15 Buna kaÌyuka bwabuna, mosi wa batu bana bakala ku mesa waÌzimbula kwena Yesu: «Kyesi kwena mutu wuna wadya mu Kipfumu kya Nzambi!» 16 Yandi waÌmuvutwala: «Mutu mosi waÌta mukinzi wa mbuta, amana waÌtedisa lawu dya batu. 17 Mu tangwa dya kudya, waÌtuma musadi wandi kenda bazimbwala batu bana kaÌtedisa yandi: “Alwisenu! Bima byosu bya kuyidika kedi byena." 18 Kaasi bawu boosu, mutu yi mutu, kakala lomba ndoluka. Watheti kaÌmuzimbwala: “Kilanga kimosi thuki mu kusumba, buluti mboti, yenda talakya; ndolula." 19 Mukwawu kaÌmuzimbwala: “Bangombi kumi thuki mu kusumba, yendi bameka phi; Yikulombibwa, wandolula." 20 Wahika wuzimbudi: “Buthwena khwediki, pfwaniku kwisa." 21 Musadi, mu kuvutuka, waÌzimbula mambu mana kwena pfumu wandi. Hanga pfumu wa nzu, mu khabu, wuzimbudi kwena musadi wandi: “Awenda tswatsu muna mabala-bala ma mbuta keti mana ma khunda, ma mbanza, amana nata kwaku baphutu yi batu bana bena yi bifu bya lutu, mutindu yi mutindu yi bifwa mesu yi bana bisi tinguna." 22 Hanga kunima, musadi wisa zimbula: “Pfumu, buna wulombiki busalami, kaasi bizika bisadi hika bya khatu." 23 Hanga pfumu wuzimbudi kwena musadi: “Awenda muna nzila yi mu mikinda mya bilanga, balundika batu mu kukota ndangu nzu yama yabasa. 24 Mukuma, yiluzimbwadibwa: ka mosi ku, wa batu bana baÌtedisa wayeÌdika madya ma meni."» 25 Milumba-lumba mya batu myakala kangala yi Yandi. Yandi wubaluki amana wubazimbwadi: 26 «Yuka mutu wisi kwena meni amana konda kabwisa tata wandi yi ngudi wandi yi mukhetu wandi yi bana bandi yi baphangi bandi ba bayakala yi baphangi ba bakhetu, keti luzingu lwa yandi meni, kafwaniku kukala mulonguki wa meni. 27 Wuna wukondi nata kitakani kyandi amana kandanda, kafwaniku kukala mulonguki wa meni. 28 Amana nati hana kati dya benu, waÌzola katunga nzu ya musyetebengi, wakonda zakala theti kikuma kya kutala ho mbongu zafwana kena zawu mu kumanisina kisalu. 29 Kondilo, kunima dya kusikula mupfundila, konda kalenda kumanisaya, amana bana boosu bakwisa mumona bakonda museya 30 mu kuzimbula: “Mutu yandu waÌyandika kutunga kaasi kaÌlendaku mu kumanisa!" 31 Holo, khi pfumu, yuka ni kendanwana yi pfumu wahika, kazakalaku theti mu kudihyula yuka wufwani, yi bayakala mafunda kumi, kunwanisa wuna wubati kwisa ku thwala yandi yi mafunda makumodi? 32 Yuka loni, buna kenina hika wuna kyana, kamuÌtumina mbambala mu kulomba ngemba. 33 Yi bwabuna ni, ha kati dya benu, wuna wukondi kudibwisa yi bima byandi byosu kapfwaniku kala mulonguki wa meni.» 34 «Mungwa kima kya mboti. Kaasi honi munzenzu wukondi, yi biki bavuÌtwalawa? 35 Weku hika mboti keti kikuma kya mafu, keti kikuma kya mvumvu; bisiwa losa ku nzila. Wuna wena yi matu ma kuyuka, kayuka!»