LOMA 5

1 Yihakana ni, bwosu thwekina batu ba masonga mu nzila ya lukwikilu, mu ngemba thwenina hakimosi yi Nzambi mwena Pfumu wetu Yesu Kidisitu. 2 Mwena yandi phi twaÌvwila, muna nzila ya lukwikilu, khenda zazi thwisi simbidila, yi zina thwisi sila mbundu, amana mwamuna phi thwisi sila lulendu lwetu muna kivuvu kya khembu ya Nzambi. 3 Thwisi sya lulendu lwetu keti muna biwayi byetu, mukuma tuzayi ni kiwayi kyisi natisa mu kikwamina, 4 kikwamina kyisi nata kwikama keti mu tangwa dya bimeka, amana kwikama keti mu tangwa dya bimeka dyisi nata kivuvu. 5 Kinga kivuvu kyisiku kwatisa tsoni, mukuma Nzambi wumwangini lungongu lwandi muna mbundu zetu mu nzila ya Kitembu Kyatoma wuna twaÌtambula. 6 Kikuma, hana twaÌkalaku kedi yi ngolu, Kidisitu waÌfwa muna tangwa dyandi kikuma kya batu bana bakonda luzitu kwena Nzambi. 7 Buthwena bwabu, phasi bwenina kwena mutu mu kufwa kikuma kya mutu wa masonga. Akolu mutu wakaÌla yi ngolu za kufwa kikuma kya mutu wa bukheti. 8 Kaasi, talandi Nzambi mutindu kaÌsongila lungongu lwandi kwena betu: Kidisitu waÌfwa kikuma kya betu, kinga hana basumuki twaÌkala. 9 Bweti bwakonda salamina ni buthwena katukitudini batu ba masonga muna menga mandi, katuÌhulwasa hika lawu ku khabu Nzambi muna nzila ya yandi. 10 Mukuma wadi buna twaÌkala theti bambeni ba Nzambi, waÌtuvutwala ngyukana yi Nzambi muna nzila ya lufwa lwa Mwana wandi; biki byakonda ni bwosu tuyukani, twahulukila phi muna luzingu lwandi. 11 Thwisiku kala lwesi bahuluka, kaasi thwisi kala yi lulendu lwetu kwena Nzambi muna lusadisu lwa Pfumu wetu Yesu Kidisitu, mwena yandi, buthwena, tuvutwadini ngyukana. 12 Yihakana ni, bwosu dyaÌkotila disumu mu tsi mu nzila ya mutu mosi, yi lufwa muna nzila ya disumu, bwabuna phi lufwa lwaÌhitila kwena batu boosu kikuma boosu baÌsumuka… 13 Mukuma, yi kuna tangwa dya mitsiku, disumu dyaÌdikadila kedi mu tsi, kaasi disumu dyisiku tangama, tangwa hisiku kala mitsiku. 14 Kaasi, tuka mu tangwa dya Atamu yi kuna tangwa dya Moyize, lufwa lwaÌyala, keti kwena batu baba bakonda sumuka hanga Atamu waÌkulula mitsiku. Atamu, yandi wuna wenina kifwani kya wuna wakhana kwisa. 15 Kaasi, bweku kitesu kimosi yi kabu dya khenda yi mutsoki; mukuma, ho mu mutsoki wa mutu mosi, baÌfwila batu balawu, amana biki byakonda ni khenda za Nzambi yi kabu dya khenda dya mutu mosi Yesu Kidisitu byavula lawu kikuma kya batu lawu. 16 Yibwabuna phi kabu dina dyisiku fwanana yi mutu mosi wuna waÌsumuka; kikuma, pfundusu yina yituki kwena mutu mosi, yisi nata kubela kwa mukanu; kinga kabu dya khenda, tuka ku mitsoki mya lawu, dibakitudi boosu batu ba masonga. 17 Mukuma, ho kikuma kya mutsoki wa mutu mosi lufwa lwaÌyadila mwena yandi-meni mutu wuna hika, kikuma kya biki ni lo babana bisi tambula khenda za lawu yi kabu dya masonga bayaÌdila mu luzingu muna lusadisu lwa yandi hika Yesu Kidisitu. 18 Yibwabuna ni, mu kikuma kya mutsoki wumosi, wunati kubela kwa mukanu kwena batu boosu, phila mosi phi masonga ma mutu mosi makatudini pfundusu ya batu boosu amana mabaheki luzingu. 19 Kikuma, phila mosi mu kukolama kwa mutu mosi, batu balawu baÌkitukila basumuki, phila mosi phi mu kulemvuka kwa mutu mosi, batu balawu bakiÌtukila bakwa masonga. 20 Kikuma mitsiku myisila ndangu mutsoki walutuka; kaasi hana malutukidini masumu, khenda za Nzambi zaÌlutuka lawu. 21 Ndangu, phila mosi yi buna maÌyala masumu mu nzila ya lufwa, phila mosi phi khenda za Nzambi zisi yala muna masonga, kikuma kya luzingu lwa mvula yi mvula, muna Pfumu wetu, Yesu Kidisitu.