1 San Pedro 3

1 Na de ru biñ mñaa, niê ziêl rlagy ñi nu “O” nii der ni ñgyeer, gun benu nac yu mbecy nu wagyicy cup consuel lo de riidz nu sac ni Crisht, orzeê ornu gzac yu de mod nap nu ricy der, orzeê dzi ga guugy lardooy. Orzeê gyicy cup yu consuel. Orzeê ni walagy ñi nu niir ni tub la riidz, 2 gun ornu gzac yu nu nap ricy der, nunu ca lagy der lo Ãgyoozh, orzeê guugy lardooy. 3 Nunu cueê cyish lo der lo coz nu rabee par ich nu gyacyit nar. Ni walagy ñi nu ti lacaê la gyicy nu der gyich toor. Ni walagy ñi nu zaab der bec or de lugaar ni cuerp nir. Ni walagy ñi nu zu der negy nu dzi ñgyup sac. 4 Nap zir nu bicy der nu nac ru mbecy cyit na nu nac mod nu na nañ lardoo der. Na benu gugy na der, nunu benu rag ziêl zu lagy der nañ lardoor, orzeê ndeê nañ gal nu na bec cyit na nu rila waded ni. Nunu ndeê tub coz nu tonaê la sac par lo Ãgyoozh. 5 Ni mod bicy de biñ mñaa ni Ãgyoozh nu guê gulas par nu bicy mi nu nap rabeem. De mi zeê bicy cup mi consuel lo Ãgyoozh, nunu bicy paa dem nu ñgyeem. 6 Ni mod bicy Sara. Bzuub gyidag mi ni ñgyeem, Abraham. Orzeê rniim rab mi yu “Shi Abraham”, rniim. Orzeê na de ru nac der mbecy nu rsyaê lo Sara benu nap ricy der, nunu benu wacchib lagy la der lo ni tub la coz. 7 Na de ru yu gyeey, pcyiiñ nu der mñaar tub mod nu raso̱o̱, nunu pca lagy der lom, como ta zir na de biñ mñaa gazeê de ru. Gun niê de mi zeê cuic Ãgyoozh nu cui mbañ mi gal nu cuic mi nu cui mbañ de ru. Ni mod bicy der, gun orzeê gad mod nu nii nu der Ãgyoozh gal nu rlagy ñi. 8 Laab nii la de riidz nu ne̱e̱ lo der. Rlagy ñi nu nap chuê dela der nu losaêr. Nunu rlagy ñi nu gyicy der tub ziêl shcab. Nunu pca der de losaêr gal nu rlagy ñi nu gyicy de mbecy nu de bicy yu. Nunu guc der mbecy gugy na. Nunu bicy shni der ub ru. 9 Cueê shiñ gyicy nu der mbecy nu shiñ ricy nu de ru. Ornu rab zi mbecy der cueê gab zir yu. Lugaar nu gyicy gal gar, orzeê nap zir nu nap bicy nuy, gun Ãgyoozh bloo sum de ru par nu nap gyicy num der. 10 Gun lat de riidz ni Ãgyoozh rniiñ: Benu ca na mbecy yet lagy yu nu cyiiñ yu gyishlombecy ii, nunu benu rlagy yu nu gusht cyiiñ yu, orzeê rlagy ñi nu cueê shiñ niiy, nunu cueê niiy riidz rguu. 11 Bruu chu der lo de coz a̱ê nap. Orzeê bicy der coz nap. Byub der tub mod nu nap nu chuê nur de losaêr. Orzeê ndeê zaab bicy la der ñii. 12 Gun Shuaan den rñam de mbecy nu nap ricy. Nunu rzuub gyidag mi ornu rnii nu dey mi. Tees zam contr ni de mbecy nu shiñ ricy. Ni Rniiñ lat de riidz ni Ãgyoozh. 13 ¿A grusu mbecy nu shiñ gyicy nuy de ru, zeê benu de ru dub laa tiem co lo der nu gyicy ru coz nap? 14 Tees mas rzac zi der nu nac nu ricy ru coz nap, orzeê ¡dzi nu der! Nunu cueê dzib der lo ni tub la mbecy. Nunu cueê sug ic der. 15 Sinu pca lagy der lo Crisht, gun mi zeê nac mi Shuaan der. Dub laa tiem bzu der altant nu tush cya der riidz nu cugyiê mbecy lo der nu nac consuel nu ricy cup der nañ lardoor. 16 Tees ornu tush cyar riidz zeê, orzeê cueê nii der riidz nu tañ za lo dey, nunu pca lagy der lo dey. Dub laa tiem bicy der coz nap, gun orzeê cueê gat lo der. Gun orzeê de mbecy nu nii zi ni der nu nac de coz nap nu ricy ru nu nac ru mbecy ni Crisht, orzeê de yu zeê gat lo dey nu nac de riidz a̱ê nap nu rnii dey. 17 Gun nap zir nu gzac zi der nu nac de coz nap nu ricy ru benu ndeê coz nu rlagy Ãgyoozh, gazeê nu gzac zi der nu nac de coz a̱ê nap nu ricy der. 18 Gun Crisht gut mi tub tir ziêl par tub la nu nac dela cyi den. Mi zeê sac cyim. Tees gut mi par de ub na, mbecy nu yuê cyi, gun orzeê guud mod nu gya num de ub na lo Ãgyoozh. Mbecy bicy dey nu gut mi, tees Espiriit nim bicy mi nu byabañ mi. 19 Zeê Espiriit nim blocyuub mi ub mi nu gua shaal mi riidz ni Ãgyoozh lo de espiriit nu yuê pres. 20 De espiriit zeê guc ñi espiriit ni de mbecy nu guê gulas tiem nu pcyiiñ Noé. Ãgyoozh tonaê la pase̱z mi gugyeem lo dey lat nu bzaa Noé barc. Tees Ãgyoozh bicy mi nu bruu nap la be dey nu nac nis zeê. Orzeê tub shuñ dey bruu nap yu. 21 Nis zeê, ndeê muesht ni nis nu gzu nis de ru tiem na. Orzeê nu nac nis zeê, orzeê Ãgyoozh co mbañ mi de ru. Ornu gzu nis den, ndeê walab nu yaruuñ nu gyecy bid nu taê cuerp ni den, sinu nu gzu nis na, ndeê yaruuñ nu gdiñ na lo Ãgyoozh nu gyicy caacy mi nañ lardoon, nunu Ãgyoozh co mbañ mi de ub na nu nac nu byabañ Jesucrisht. 22 Jesucrisht, biñ nu gup gyibaa, nunu zub mi par yaa bee Ãgyoozh, riib ic mi de anc, gal nu deê zir espiriit nu riib ic de espiriit nu dzi rcyiiñ.